மொழிபெயர்ப்பின் மூலக் கட்டுரையை இங்கே காணலாம். 

கடந்த செவ்வாயன்று செனட் ஆயுத சேவைகள் குழுவானது, ஜனாதிபதியாக தேர்ந்தெடுக்கப்பட்ட டொனால்ட் ட்ரம்பால் பாதுகாப்பு செயலாளராக பரிந்துரைக்கப்பட்ட ஃபாக்ஸ் நியூஸ் வர்ணனையாளரும் போர்க்குற்றங்களுக்கு வக்காலத்து வாங்குபவருமான பீட் ஹெக்செத்தை உறுதிப்படுத்துவது குறித்து தனது முதல் மற்றும் ஒரே விசாரணையை நடத்தியது. இந்த விசாரணையைத் தொடர்ந்து, செனட்டில் குடியரசுக் கட்சியினரின் கட்டுப்பாட்டில் 53-47 வாக்குகள் உள்ள நிலையில், ஹெக்செத் இப்பதவிக்கு உறுதிப்படுத்தப்பட வாய்ப்புள்ளது என்றும், யாரும் எதிர்ப்புக் காட்டவில்லை என்றும் பெருநிறுவன ஊடக அறிக்கைகள் சுட்டிக்காட்டின.

போர்க்குற்றங்களை வெளிப்படையாக ஆதரித்துவரும் ஹெக்சேத், கைதிகளைக் கொலை செய்வதில் இழிபுகழ் பெற்ற ஒரு பிரிவில் காலாட்படை சிப்பாயாகவும், குவாண்டனாமோ விரிகுடா சிறை முகாமில் காவலராகவும் நேரடியாக பங்கேற்றிருக்கிறார். அவரது பதவி உறுதிப்படுத்தல் விசாரணையில், குவாண்டனாமோ விரிகுடாவில் கிடைத்த தனது அனுபவம், நீரில் மூழ்கடித்தல் எனப்படும் ஒரு வகையான சித்திரவதையில் தன்னை ஒரு நிபுணராக ஆக்கியது என்றும், அதை தான் வெளிப்படையாக ஆதரிப்பதாகவும் கூறினார்.

தனது பதவி உறுதிப்படுத்தல் விசாரணையின் போது, ஜெனீவா உடன்படிக்கைகளை கடுமையாக சாடிய ​​ஹெக்ஸெத், “ஜெனீவா உடன்படிக்கைகள் எழுதப்பட்டபோது நாம் நடத்திய போர்கள் மிகவும் வித்தியாசமானவை என்பதை நாம் அனைவரும் ஒப்புக் கொள்ள வேண்டும்” என்று அறிவித்தார்.

ஹெக்ஸெத் பாதுகாப்புத் துறையின் தலைவராக பரிந்துரைக்கப்பட்டிருப்பதானது, அவரது நியமனம் அங்கீகரிக்கப்படும் என்பது ஒருபுறம் இருக்க, அமெரிக்க ஜனநாயகம் அதன் பேரழிவு தருவாயை அடைந்து வருவதைக் காட்டுகிறது.

அமெரிக்காவால் பல தசாப்தங்களாக தொடுக்கப்பட்டுவரும் இடைவிடாத போரின் போது கட்டவிழ்த்துவிடப்பட்ட குற்றங்கள், சட்டப்பூர்வமாக்கப்பட்ட சித்திரவதைகள், பொதுமக்களை பெருமளவில் கொல்வது மற்றும் காஸா இனப்படுகொலைக்கு ஆதரவளித்து வருவது ஆகியவை, உள் நாட்டுக்குள்ளே கொண்டு வரப்படுகின்றன. உலகெங்கிலும் உள்ள அமெரிக்க இராணுவத்தின் குற்றவியல் நடவடிக்கைகள் உள்நாட்டு அரசியல் அடக்குமுறைக்கு அடிப்படையாக இருக்கும்.

ட்ரம்பின் அனைத்து நியமனங்களைப் போன்றே, ஹெக்செத்தின் அரசியலும் மிகவும் வெளிப்படையான பாசிசவாதமாக இருக்கிறது. அவர் வெளிப்படையாக யுத்தக் குற்றங்களை பாதுகாத்து வருவதோடு, அரசியல் எதிரிகளுக்கு எதிராக இராணுவத்தைப் பயன்படுத்தவும் வக்காலத்து வாங்குகிறார். ஹெக்சேத்தின் நியமனமானது, உள்நாட்டிலோ அல்லது வெளிநாட்டிலோ, இராணுவ பலத்தைப் பயன்படுத்துவதன் மீதான எந்தவொரு அரசியலமைப்பு கட்டுப்பாட்டையும் ட்ரம்ப் முழுமையாக அலட்சியம் செய்வதை எடுத்துக்காட்டுகிறது.

வரவிருக்கும் ஜனாதிபதிக்கான தனிப்பட்ட விசுவாசத்தின் அடிப்படையிலும், போர்க் குற்றங்களில் குற்றவாளிகளாக இருக்கும் அமெரிக்க சிப்பாய்களை ஆதரிப்பதற்கான பகிரங்க ஆதரவின் ஒரு முன்வரலாறின் அடிப்படையிலும், ட்ரம்ப் ஹெக்செத்தை தேர்ந்தெடுத்திருப்பது, ட்ரம்பால் இலக்கு வைக்கப்பட்ட நாடுகளுக்கு எதிராகவும் மற்றும் உள்நாட்டில் மக்கள் எதிர்ப்புக்கு எதிராகவும் அமெரிக்க இராணுவ வன்முறையின் ஒரு வெடிப்பு வரவிருக்கிறது என்பதற்கான ஒரு அச்சுறுத்தும் எச்சரிக்கையாகும்.

ஜனநாயகக் கட்சியின் பங்கு ஆளும் வர்க்கம் சர்வாதிகாரத்தை நோக்கி பாய்வதற்கு வசதியளித்து மூடிமறைப்பது ஆகும். நான்கு மணி நேரத்திற்கும் மேலாக நடந்த விசாரணையில், குழுவில் இருந்த ஒரு ஜனநாயகக் கட்சிக்காரர் கூட “பாசிஸ்ட்” என்ற வார்த்தையை ஒருமுறை கூட உச்சரிக்கவில்லை. அணு ஆயுதங்கள், மேம்பட்ட தொழில்நுட்பத்தை கொண்டிருக்கும் குண்டுவீச்சு விமானங்கள், ஏவுகணை நீர்மூழ்கிக் கப்பல்கள் மற்றும் ஹைப்பர்சோனிக் ஆயுதங்கள் நிறைந்த ஒரு அமைப்பின் தலைவராக வேட்புமனுவை நாடும் ஒரு நபர், “உள்நாட்டு எதிரிகளுக்கு” எதிராக இராணுவத்தைப் பயன்படுத்துவதற்கான தனது ஆதரவை மீண்டும் மீண்டும் சுட்டிக்காட்டியுள்ளார் என்பதையும் ஜனநாயகக் கட்சியினர் மக்களை எச்சரிக்கவில்லை.

போர்க் குற்றவாளிகளுக்கான அவரது ஆதரவு, ஜெனீவா மாநாட்டை நிராகரித்தல் மற்றும் ட்ரம்பின் தோல்வியுற்ற ஆட்சிக்கவிழ்ப்பு சதிக்கான ஆதரவு ஆகியவற்றிற்கு கூடுதலாக, ஹெக்சேத் அவரது உடலில் தொடர்ச்சியான பாசிசத்தை வெளிப்படுத்திக்காட்டும் பச்சை குத்தியுள்ளார், இதில் இலத்தீன் சொற்றொடரான “கடவுள் அதை விரும்புகிறார்” (“Deus Vult”) என்பதும் அடங்கும். மத்தியகால சிலுவைப் போர்களில் தோன்றிய இந்த முழக்கம், இன்றைய வெள்ளை மேலாதிக்கவாதிகள், கிறிஸ்தவ பாசிஸ்டுகள் மற்றும் இஸ்லாமிய வெறுப்பாளர்களால் ஏற்றுக்கொள்ளப்பட்டுள்ளது.

குறிப்பாக, கடந்த செவ்வாய்க்கிழமை இடம்பெற்ற விசாரணையின் போது, ஒரு ஜனநாயகக் கட்சியினர் கூட ஹெக்சேத்தின் பச்சை குத்தல்கள் குறித்து கேள்வி எழுப்பவில்லை. இரண்டு மணி நேரத்திற்குப் பின்னர், ஹெக்சேத் தனது பாசிச “போர்வீரர் நெறிமுறைகளை” முன்னெடுப்பதற்கு ஒரு வாய்ப்பை வழங்குவதற்காக மட்டுமே, வடக்கு டகோட்டா குடியரசுக் கட்சி செனட்டர் கெவின் கிரேமர் இப்பிரச்சினையை எழுப்பினார்.

மிக சமீபத்தில், ஹெக்செத் வெளியிட்ட “போர்வீரர்கள் மீதான போர்: நம்மை சுதந்திரமாக வைத்திருக்கும் மனிதர்களின் காட்டிக்கொடுப்புக்குப் பின்னால்“ என்ற புத்தகம், அடோல்ஃப் ஹிட்லரின் “முதுகில் குத்துதல்” தத்துவத்தின் ஒரு மாறுபாடாகும். இது, முதலாம் உலகப் போரில் ஜேர்மனியின் இராணுவத் தோல்விக்கு “யூத-போல்ஷிவிசத்தால் பாதிக்கப்பட்ட” ஒரு துரோகத்தனமான உள்நாட்டுப் போர்முனையைக் குற்றஞ்சாட்டியது. ஹெக்செத்தின் புத்தகத்தில், அவரும் ஏனைய “தேசபக்தர்களும்” ஈராக், ஆப்கானிஸ்தான் மற்றும் லிபியாவில் அமெரிக்க ஏகாதிபத்திய போர்களை எதிர்த்துப் போராடிக் கொண்டிருந்த சமயத்தில், “உள்நாட்டில் அமெரிக்காவின் உள்நாட்டு எதிரிகள்... பாய்ந்தனர்.”

இந்த “இடதுசாரிகள் போர்களில் ஈடுபடவில்லை. அவர்கள் வீட்டிலேயே இருந்து எங்கள் வீட்டை நாசமாக்கினர். அவர்கள் அனைவரும் அமெரிக்காவை அழித்தவர்கள்”, என்று அவர் எழுதினார். “உள்நாட்டு எதிரிகளில் தீவிர இடதுசாரிகள்”, “ஆன்டிஃபா”, “பிஎல்எம்” மற்றும் இப்போது “ஹமாஸ் ஆதரவாளர்கள்” மற்றும் பிற “முற்போக்கான அதிரடி துருப்புக்கள்” (காசாவில் இஸ்ரேலிய இனப்படுகொலையை எதிர்ப்பவர்களுக்கு எதிரான அவதூறு) ஆகியோர் அடங்குவர். “வெளிநாட்டு மற்றும் உள்நாட்டு எதிரிகள் என அனைத்து எதிரிகளிடமிருந்தும், [அமெரிக்காவை] பாதுகாப்போம் என்பதே எதிர்பார்ப்பு”. மேலும், “அவர்கள் அரசியல் எதிரிகள் அல்ல, ஆனால் உண்மையான எதிரிகள்” (ஆம், மார்க்சிஸ்டுகள் எங்கள் எதிரிகள்) என்று ஹெக்ஸெத் தனது புத்தகத்தில் எழுதினார்

விசாரணையின் போது, ஹெக்சேத் “ஆட்சேர்ப்பு மற்றும் தக்கவைப்புக்கு” தீங்கு விளைவிக்கும் “விழித்தெழுந்த” கொள்கைகள் என்று அவர் குறிப்பிட்டவற்றை மீண்டும் மீண்டும் தாக்கினார். மேலும் ட்ரம்பின் பாதுகாப்புச் செயலராக அவர் “மரணத்திற்கு” முன்னுரிமை அளிப்பதாக உறுதியளித்தார். குடியரசுக் கட்சி செனட்டர் எரிக் ஷ்மிட் (மிசௌரி), “கடந்த நான்கு ஆண்டுகளின் பலவீனம் மற்றும் விழிப்புணர்வுக்கு முற்றிலும் மாறுபட்ட ஒரு நெறிமுறையை, ஒரு போர்வீரர் நெறிமுறையை மீட்டெடுப்பதில் பாதுகாப்புத் துறைக்கு தெளிவு மற்றும் தொலைநோக்கு பார்வையை வழங்கியதற்காக” ஹெக்செத்துக்கு நன்றி தெரிவித்தார்.

“கலாச்சார மார்க்சியத்தில் வேரூன்றிய “DEI” (பன்முகத்தன்மை, சமத்துவம் மற்றும் உள்ளடக்கம்) நோயால் இராணுவம் பாதிக்கப்பட்டுள்ளதாக ஷ்மிட் கூறினார். இதற்கு பதிலளிக்கும் விதமாக, டசின் கணக்கானவர்கள் காயமடைந்து 14 க்கும் அதிகமானவர்கள் கொல்லப்பட்ட இரண்டு அமெரிக்க இராணுவ சிப்பாய்கள் புத்தாண்டு தினத்தன்று வன்முறையான தாக்குதல்களைத் தொடங்கி இரண்டு வாரங்களுக்கும் குறைவான காலத்திற்குப் பின்னர், அமெரிக்க இராணுவத்தில் “தீவிரவாதம்” என்பது “ஆரம்பத்தில் உருவாக்கப்பட்ட ஒரு பூச்சாண்டி” என்று ஹெக்சேத் வாதிட்டார்.

கடந்த இரண்டு தசாப்தங்களாக அமெரிக்க இராணுவத்திற்குள் உருவாக்கப்பட்ட “போர்வீரர் நெறிமுறைகள்” என்ற சொல், உள்நாட்டிலும் வெளிநாட்டிலும் அமெரிக்க தன்னலக்குழுவின் நலன்களை முன்னெடுப்பதற்காக வரம்பற்ற மற்றும் கட்டுப்பாடற்ற மிருகத்தனம் மற்றும் குற்றத்தன்மையைக் குறிக்கிறது. அதன் போர் மகிமைப்படுத்தலும் சமூகத்தை இராணுவமயமாக்கலும் நாஜி சித்தாந்தத்தில் நேரடி வேர்களைக் கொண்டுள்ளன.

ஜனநாயகக் கட்சியினர் ஹெக்செத் ஒரு “சண்டையிடும் மனிதனின் நெறிமுறையை” ஊக்குவிப்பதைக் குறித்து ஒன்றும் பேசவில்லை அல்லது அதன் பாசிச உள்ளடக்கத்தை அம்பலப்படுத்தவில்லை. அவர்கள் ஆப்கானிஸ்தான் மற்றும் மத்திய கிழக்கில் போர்களை ஆதரித்து வருவதால், குறிப்பாக காஸாவில் இஸ்ரேலிய இனப்படுகொலையை ஆதரிப்பதால், அவர்களால் அவ்வாறு செய்ய முடியவில்லை.

ஏகாதிபத்திய இராணுவக் கொள்கை மற்றும் அதன் இரத்தந்தோய்ந்த வழிமுறைகளின் சாராம்சத்தில் இருந்து திசைதிருப்பும் வகையில், அவர்கள் ஏறக்குறைய அவர்களின் கேள்விகள் அனைத்திலும் இராணுவத்தில் பெண்கள் குறித்த ஹெக்செத்தின் முந்தைய அறிக்கை, பாலியல் துரோகம் குறித்த முந்தைய குற்றச்சாட்டுகள் மற்றும் பெரிய அமைப்புகளை நிர்வகிப்பதில் அவரது வெளிப்படையான அனுபவமின்மை ஆகியவற்றின் மீது ஒருங்குவிந்தனர்.

பெண்களின் பங்கை ஆதரிப்பதில், அவர்கள் அனைவரும் வரும் ஆண்டுகளில், அமெரிக்க சிப்பாய்கள் மொத்தமாக போர்க்களங்களுக்கு அனுப்பப்படுவார்கள் என்பதையும், இந்தப் பணியை நிறைவேற்ற அமெரிக்க இராணுவம் கட்டமைக்கப்பட வேண்டும் என்பதையும் இயல்பான ஒரு விஷயமாக ஏற்றுக்கொண்டனர்.

“அமெரிக்கா முதலில் என்ற வெளியுறவுக் கொள்கை” என்பது “அமெரிக்கா மட்டும்தானா?” என்று நெவாடாவின் ஜனநாயகக் கட்சி உறுப்பினர் ஜாக்கி ரோசன் கேட்டபோது, “பாலினம் மற்றும் தனிநபர் மீறல்கள் பிரச்சினைகளில் ஒருங்குவிந்ததில் இருந்து ஒரேயொரு விலகல் ஏற்பட்டது. … நேட்டோ, தாய்வான், இஸ்ரேல் மற்றும் பிறவற்றைப் போன்ற நமது கூட்டாளிகள் மற்றும் பங்காளிகளைக் கைவிடுவதும் இதில் உள்ளடங்குமா?”

பாலினம் மற்றும் தனிப்பட்ட மீறல்கள் பற்றிய கேள்விகளைத் தவிர, நெவாடாவைச் சேர்ந்த ஜனநாயகக் கட்சி உறுப்பினர் ஜாக்கி ரோசன், “அமெரிக்கா முதல் என்ற வெளியுறவுக் கொள்கை அமெரிக்காவின் ஒரே வெளியுறவுக் கொள்கையா” என்றும், “இதில் நமது நட்பு நாடுகளான நேட்டோ, தைவான், இஸ்ரேல் மற்றும் பிற நாடுகளைக் கைவிடுவதும் அடங்குமா”? என்றும் கேட்டிருந்தார். பின்னர் ரோசன், “ டொனால்ட் ட்ரம்ப் உக்ரேனுக்கு ஆதரவாக நிற்கப் போகிறாரா? ... நீங்கள் உக்ரேனுக்கு ஆதரவாக நிற்கப் போகிறீர்களா”? என்று கேட்டிருந்தார்.

இங்குதான் ஜனநாயகக் கட்சியின் கொள்கைக்கான திறவுகோல் உள்ளது. ஓர் அணுஆயுத மோதல் அபாயத்திலும் கூட, உக்ரேனில் ரஷ்யாவுக்கு எதிரான போரில் அமெரிக்காவின் பொறுப்புறுதியை ட்ரம்ப் பேணும் வரையில், ஜனநாயகக் கட்சியினர், அமெரிக்க ஏகாதிபத்தியத்தின் இரண்டு கட்சிகளில் ஒன்றாக, ஏனைய ஒவ்வொரு துறையிலும் ஒத்துழைக்க தயாராக உள்ளனர்.