மொழிபெயர்ப்பின் மூலக் கட்டுரையை இங்கே காணலாம். 

அமெரிக்கப் பங்குச் சந்தையும் நிதிய அமைப்புமுறையும் அடிப்படை உண்மைப் பொருளாதாரத்திலிருந்து எந்த அளவிற்கு விலகியுள்ளன என்பது, கடந்த இரண்டு ஆண்டுகளில் வோல் ஸ்ட்ரீட்டின் முக்கிய குறியீடான S&P 500 இன் உயர்வில் வெளிப்படுகிறது.

டிசம்பரில் 2.5 சதவீதம் பங்குகள் விற்கப்பட்டிருந்தபோதிலும், தொடர்ந்து இரண்டாவது ஆண்டாக இந்தக் குறியீட்டெண் 20 சதவீதத்திற்கும் மேலாக உயர்ந்துள்ளது.

முந்தைய ஆண்டில் 24.2 சதவீத உயர்வைத் தொடர்ந்து 2024 ஆம் ஆண்டில் சந்தை 23.3 சதவீதம் உயர்ந்தது. இது இந்த நூற்றாண்டில் மிகப்பெரிய இரண்டு ஆண்டில் ஏற்பட்ட உயர்வு மற்றும் கடந்த ஆறு ஆண்டுகளில் 20 சதவீதத்திற்கும் அதிகமான S&P ஆதாயங்களின் எண்ணிக்கையை நான்காகக் கொண்டுவருகிறது.

கடந்த இரண்டு ஆண்டுகளில் பங்குச் சந்தை 40 சதவீதத்திற்கும் அதிகமாக உயர்ந்துள்ளது. இது வெறும் 3 சதவீத மிதமான வளர்ச்சி வீதத்தில் இயங்கும் அமெரிக்கப் பொருளாதாரத்தின் காரணமாக அல்ல. மாறாக, உயர்-தொழில்நுட்பப் பங்குகளைச் சுற்றியுள்ள ஊக எதிர்பார்ப்புகள், குறிப்பாக செயற்கை நுண்ணறிவு (AI) வளர்ச்சியுடன் தொடர்புடைய பங்குகளின் மீதான ஊக மிகைப்படுத்தல் (speculative hype) வணிகம் இதற்குக் காரணம் ஆகும்.

வரவிருக்கும் ட்ரம்ப் நிர்வாகம் வரி வெட்டுக்கள் மூலமாகவும் மற்றும் பல துறைகளில் ஒழுங்குமுறைகளில் எஞ்சியிருப்பவற்றை அகற்றுவதன் மூலமாகவும் பெருநிறுவன மற்றும் நிதிய மூலதனத்திற்கு மிகவும் சாதகமாக இருக்கும் என்ற எதிர்பார்ப்பாலும் அது ஊக்கம் பெற்றுள்ளது.

பெடரல் ரிசர்வ் 2025 ஆம் ஆண்டில் வட்டி விகிதங்களை மேலும் குறைக்கும் என்ற எதிர்பார்ப்புகளால் சந்தையின் உயர்வு முன்னோக்கி உந்தப்பட்டுள்ளது, இருப்பினும் அந்த உணர்வு அதன் டிசம்பர் கூட்டத்திற்குப் பிறகு ஓரளவு தனிந்திருப்பதாகத் தோன்றியுள்ளது. தலைவர் ஜெரோம் பவல் (Jerome Powell) மேலும் விகிதக் குறைப்புகளுக்கு மிகவும் “எச்சரிக்கையான” முறையில் தனது அணுகுமுறையைச் சுட்டிக்காட்டியுள்ளார், மேலும் ஆளும் குழுவின் உறுப்பினர்கள் வரும் ஆண்டில் வட்டி விகிதக் குறைப்புகளின் எண்ணிக்கை குறித்த எதிர்பார்ப்பை நான்கிலிருந்து இரண்டாகக் குறைத்துள்ளனர்.

சீனாவின் பொருட்கள் மீது 60 சதவீதமும் மற்ற நாடுகளில் இருந்து வரும் பொருட்கள் மீது 20 சதவீதமும் என ட்ரம்ப் முன்கணித்த சுங்கவரிகளின் அதிகரிப்புகள் பணவீக்கத்தை அதிகரிக்கக்கூடும் என்பதோடு, வட்டி விகித குறைப்புகளுக்கு குறைந்தளவு வாய்ப்புகளையே உருவாக்கும் என்று பெடரலின் கொள்கை வகுக்கும் அமைப்புகளில் கவலைகள் ஏற்பட்டிருக்கின்றன.

எப்போதும் போல பங்குச் சந்தை கண்ணீர் விடும்போது, அது இன்னும் உயரும் என்று சொல்பவர்களும் இருக்கிறார்கள். டிசம்பர் தொடக்கத்தில், பாங்க் ஆஃப் அமெரிக்கா நடத்திய ஒரு மாதாந்திர கணக்கெடுப்பின்படி, S&P 500 க்கு சொத்து மேலாளர்களின் நீண்டகால வெளிப்பாடு 20 ஆண்டுகளில் மிக உயர்ந்த மட்டத்திற்கு உயர்ந்துள்ளது என்று அறிவித்தது. இது “நல்ல ஆக்ரோஷமான நம்பிக்கை” (super-bullish sentiment) என்று அழைக்கப்பட்டிருந்தது. பங்குச் சந்தை ஆதாயங்களுக்கான சில்லறை முதலீட்டாளர்களின் உற்சாகம் முன்னொருபோதும் இல்லாத அளவுக்கு அதிகமாக இருந்ததாக ஜேர்மன் வங்கி (Deutsche Bank) தெரிவித்துள்ளது.

பைனான்சியல் டைம்ஸ் அறிக்கையில் மேற்கோளிடப்பட்ட பேங்க் ஆஃப் அமெரிக்காவின் ஒரு மூலோபாயவாதியான பெஞ்சமின் பௌலரின் கருத்துப்படி, ட்ரம்பின் “தடையற்ற பொருளாதாரம், வரி வெட்டுக்கள் மற்றும் ஒழுங்குமுறைகளில் தளர்வு” ஆகியவை சாத்தியமான “செயற்கை நுண்ணறிவு புரட்சியுடன்” சேர்ந்து, 2025 இல் பங்குச் சந்தை ஏற்றம் தொடரும் என்பதையே அர்த்தப்படுத்தியிருக்கிறது. 2024 பங்குகளுக்கு ஒரு “நல்ல ஆண்டு” என்றாலும், “இது ஒரு தொடக்கமாக மட்டுமே எடுத்துக்கொள்ளலாம்.”

சந்தை மிகைப்படுத்தல்களுக்கு மத்தியில், உலகளாவிய பொருளாதாரத்தின் நிலை மற்றும் ட்ரம்பின் “அமெரிக்கா முதலில்” (“America First”) கொள்கைகளின் தாக்கம் காரணமாக எச்சரிக்கைகள் ஒலிக்கப்படுகின்றன.

சிகாக்கோ பல்கலைக்கழகத்தில் பைனான்சியல் டைம்ஸ் மற்றும் பூத் ஸ்கூல் ஆஃப் பிசினஸ் நடத்திய பொருளாதார வல்லுநர்களின் ஒரு ஆய்வின்படி, ட்ரம்பின் கொள்கைகள் பணவீக்கத்தை அதிகரிக்கும் மற்றும் வட்டி விகித வெட்டுக்கள் மீது பெடரலின் மிகவும் எச்சரிக்கையான அணுகுமுறைக்கு வழிவகுக்கும் என்று பலர் நம்புகின்றனர்.

“ட்ரம்பின் கொள்கைகள் குறுகிய காலத்தில் சில வளர்ச்சியைக் கொண்டு வரக்கூடும், ஆனால் இது உலகளாவிய மந்தநிலையின் தாக்கத்திற்கு இட்டுச்செல்லும், அதுவே பின்னர் திரும்பி அமெரிக்காவை பாதிக்கும்” என்று பிரவுன் பல்கலைக்கழகத்தின் பேராசிரியரும் நியூ யோர்க் பெடரலின் ஒரு ஆலோசகருமான செப்னெம் கலெம்லி-ஓஸ்கான் பைனான்சியல் டைம்ஸ் பத்திரிகைக்குத் தெரிவித்துள்ளார்.

“அவரது (ட்ரம்ப்) கொள்கைகள் அமெரிக்காவிலும் உலகின் பிற பகுதிகளிலும் பணவீக்கத்தை ஏற்படுத்துகின்றன, எனவே நாம் ஒரு தேக்கநிலை உலகத்தை நோக்கிச் செல்வோம்.”

உலகப் பொருளாதாரத்தின் பிரதான கூறுபாடுகளில் தேக்கம் என்பது பற்றிக் கொண்டிருக்கிறது என்பதற்கான பரந்தளவில் அறிகுறிகள் காணப்படுகின்றன. பிரதான பொருளாதாரமான ஜேர்மனி, அதன் பிரதான தொழில்துறைகளில், எல்லாவற்றிற்கும் மேலாக வாகனத்துறை உற்பத்தியில் பணிநீக்கங்கள் செய்யப்பட்ட நிலையில், போருக்குப் பிந்தைய காலத்தில் அதன் மிக மோசமான வீழ்ச்சியை முகங்கொடுத்து வருவதால், யூரோப்பகுதி அரிதாகவே வளர்ந்து வருகிறது.

ஒரு ஜேர்மன் வங்கியின் தலைமை பொருளாதார வல்லுனர் பைனான்சியல் டைம்ஸ்க்கு கூறுகையில், ஐரோப்பா விரைவில் “மறைந்த ஹாப்ஸ்பேர்க் சாம்ராஜ்யத்தை” (“late Hapsburg empire”) ஒத்திருக்கப் போகிறது, பொருளாதாரரீதியாகவும் தொழில்நுட்பரீதியாகவும் பின்தங்கியும், “அதன் முந்தைய மகத்துவத்தின் துயரமான நினைவுகளால்” மேலாதிக்கம் செலுத்தப்படும் என்றும் கூறினார்.

2024 ஆம் ஆண்டிற்கான அதன் இலக்கான சுமார் 5 சதவீத வளர்ச்சியை எட்டுவதற்கு சீனா போராடி வருகிறது - பெரும்பாலான பார்வையாளர்கள் அந்த இலக்கை அது எட்டும் என்று கருதுகின்றனர், ஆனால் உத்தியோகபூர்வ தரவுகளின் துல்லியம் குறித்து கணிசமான சந்தேகம் உள்ளது - மேலும் 2025 இல் வளர்ச்சி குறையும் என்று கணிப்புகளும் உள்ளன.

சீனத் தலைமையின் கவலைகள் ஜனாதிபதி ஜி ஜின்பிங்கின் புத்தாண்டு உரையில் பிரதிபலித்தன, அதில் அவர் முந்தைய ஆண்டின் ஆட்சியின் சாதனைகளை வெறுமனே புகழ்ந்து பேசுவதற்கு பதிலாக நேரடியாகப் பொருளாதாரத்தின் நிலை குறித்து எச்சரித்துள்ளார்.

பொருளாதாரம் “சில புதிய சூழ்நிலைகளை” முகங்கொடுத்து வருவதாகவும், அங்கே “வெளிப்புற சூழலின் நிச்சயமற்ற தன்மையிலிருந்து வரும் சவால்கள்” (ட்ரம்பின் சுங்கவரி உயர்வுகள் குறித்த ஒரு மறைமுக குறிப்பு) மற்றும் “புதிய மற்றும் பழைய இயக்கிகளின் மாற்றத்திலிருந்து” வரும் அழுத்தங்கள் இருப்பதாகவும் அவர் எச்சரித்தார்.  பழைய இயக்கி என்ற சொல் சொத்து மற்றும் மனைக் கட்டுமான சந்தையில் கடுமையான சரிவைக் குறிக்கிறது, இது 2008 உலகளாவிய நிதிய நெருக்கடிக்குப் பின்னர் சீன வளர்ச்சியின் முக்கிய ஆதாரமாக இருந்துள்ளது.

நிதி நிலைமைகளைப் பொறுத்தவரை, முக்கிய பிரச்சினை தனியார் பங்குச் சந்தைகள் வகிக்கும் அதிகரித்தளவிலான பங்களிப்பாகும். உலகளாவிய ஆலோசனை நிறுவனமான McKinsey நிர்வாகத்தின் கீழ் உள்ள தனியார் சந்தைகளின் சொத்துக்கள் 2023 ஆம் ஆண்டின் நடுப்பகுதியில் $13.1 டிரில்லியன் டாலர்கள் அடைந்ததாகவும், 2018 முதல் ஆண்டுக்கு சுமார் 20 சதவீதம் அதிகரித்து வருவதாகவும் மதிப்பிடுகிறது.

இந்த புள்ளிவிபரங்கள் குறித்து, பைனான்சியல் டைம்ஸ் கட்டுரையாளர் ஜோன் பிளெண்டர் குறிப்பிட்ட கட்டுரையில், “முதலீட்டாளர்கள், கொள்கை வகுப்பாளர்கள் மற்றும் பொதுமக்களுக்கு வெளிப்படைத்தன்மையற்ற வகையில் பங்குச் சந்தை மற்றும் பொருளாதாரத்தின் விகிதத்தில் ஒரு குறிப்பிடத்தக்க அதிகரிப்பு ஏற்பட்டுள்ளது” என்று குறிப்பிட்டார்.

சர்வதேச நாணய நிதியம் (IMF), சர்வதேச தீர்வுகளுக்கான வங்கி (Bank for International Settlements) மற்றும் மத்திய வங்கி (Fed) உட்பட முக்கிய நிதிய அமைப்புக்கள், தனியார் பங்குச் சந்தைகளின் செயற்பாடுகள் மற்றும் அவை முக்கிய வங்கிகளுடன் கொண்டுள்ள தொடர்புகள் குறித்து தங்களுக்கு உண்மையான புரிதல் ஏதும் இல்லை என்றுசுட்டிக்காட்டியுள்ளன.

பிளெண்டர் கருத்துரைத்ததைப் போல, “ஒழுங்குபடுத்தப்பட்ட வங்கி முறையுடனான இடைத்தொடர்பு, அவற்றின் கடன்களின் விதிமுறைகளின் மறைமுகத்தன்மை, அவற்றின் கடன்களின் பணமாக்க முடியாத நிலைமை மற்றும் நிதிகளைத் திரும்பப் பெறுவதற்கான வரையறுக்கப்பட்ட பங்காளிகளின் (முதலீட்டாளர்கள்) தேவைகளுடன் சாத்தியமான பொருத்தமின்மை ஆகியவைளால் தனியார் சமபங்கு கடன் நிதிகள் பரந்த நிதிய அமைப்புமுறைக்கு சாத்தியமான, முறையான அபாயங்களின் ஒரு தனித்துவமான தொகுப்பை முன்வைக்கின்றன.”

வேறு வார்த்தைகளில் கூறுவதானால், பங்குச் சந்தை முன்னோக்கி எழுச்சி பெறுகின்ற நிலையிலும் கூட, நிதிய அமைப்புமுறையில் பிரதான பிரச்சினைகள் உருவாக்கப்படலாம், கட்டுப்பாட்டாளர்கள் தங்கள் தலைக்கு மேல் வெடிக்கும்போது மட்டுமே அவற்றைப் பற்றி அறிந்துகொள்வார்கள்.

“அடுத்த நிதியியல் நெருக்கடி எங்கிருந்து எழும் என்பதை ஊகிப்பதற்கு எந்த வழிமுறைகளும் இல்லை” என்று அவர் நிறைவு செய்தார்.