மொழிபெயர்ப்பின் மூலக் கட்டுரையை இங்கே காணலாம். 

பின்வரும் அறிக்கை நான்காம் அகிலத்தின் அனைத்துலகக் குழுவின் ஜேர்மன் பிரிவான சோசலிச சமத்துவக் கட்சியால் (Sozialistische Gleichheitspartei – SGP) வெளியிடப்படுகிறது. பிப்ரவரி 23 அன்று நடைபெறவிருக்கும் ஜேர்மன் கூட்டாட்சித் தேர்தல்களில் போட்டியிடுவதற்கு, கூட்டாட்சி தேர்தல் குழு SGP க்கு அங்கீகாரம் அளித்துள்ளது.

ஜேர்மன் கூட்டாட்சி தேர்தல்களில், போர் மற்றும் சிக்கனக் கொள்கையை ஆதரிக்கும் அனைத்துக் கட்சி கூட்டணியை எதிர்த்து சோசலிச சமத்துவக் கட்சி போட்டியிடுகிறது. உலகெங்கிலும் உள்ள நான்காம் அகிலத்தின் சகோதரக் கட்சிகளுடன் சேர்ந்து, போர், பாரிய வேலைநீக்கங்கள் மற்றும் ஊதிய வெட்டுக்களின் பைத்தியக்காரத்தனத்தை நிறுத்த ஒரு சர்வதேச இயக்கத்தை நாங்கள் கட்டியெழுப்பி வருகிறோம்.

எமது இலக்கு முதலாளித்துவத்தை சீர்திருத்துவது அல்ல, மாறாக அதை ஒழித்துக்கட்டுவதாகும். கடந்து செல்லும் ஒவ்வொரு நாட்களும் முதலாளித்துவ அமைப்புமுறை திவாலாகி உள்ளது என்பதையும், சமூகச் சீரழிவு, போர் மற்றும் சுற்றுச்சூழல் பேரழிவுகளை மட்டுமே அது உருவாக்கி வருகிறது என்பதையும் மீண்டும் நிரூபிக்கிறது. செல்வந்தர்களின் இலாபங்களை விட, பெரும்பான்மையினரின் தேவைகள் முன்னுரிமை பெறும் ஒரு சோசலிச சமுதாயத்திற்காக நாங்கள் போராடுகிறோம்.

உலகப் பொருளாதாரம் மற்றும் நிதியியல் சந்தைகளில் மேலாதிக்கம் செலுத்திவரும் பில்லியனர் தன்னலக்குழுக்கள், பாசிசம் மற்றும் போரின் மூலமாக மட்டுமே, அவர்களது அதிகாரத்தைத் தக்க வைத்துக் கொள்ள முடியும். இது உலகின் மிக சக்திவாய்ந்த முதலாளித்துவ நாடான அமெரிக்காவை விட வேறெங்கும் இந்தளவுக்கு வெளிப்படையாக இல்லை. ஜனவரி 20 அன்று, குற்றவாளிகள், பாசிசவாதிகள் மற்றும் பல பில்லியன்களை குவித்து வைத்திருப்பவர்களின் ஒரு அரசாங்கம் அதிகாரத்திற்கு வருகிறது.

ரியல் எஸ்டேட் ஜம்பவானும், சூதாட்ட கேசினோ நடத்துபவருமான டொனால்ட் ட்ரம்ப், ஒரு தண்டனை பெற்ற குற்றவாளியாவர். அவர் பொருளாதார ரீதியாக மிரட்டி பணம் பறித்தல், இராணுவ ஆக்கிரமிப்பு மற்றும் வன்முறை அடக்குமுறை கொள்கையை பின்பற்றி வருகிறார். அவர் சீனா மற்றும் ஏனைய பொருளாதார போட்டியாளர்களை மட்டும் தண்டிக்கும் சுங்கவரிகள் மற்றும் இராணுவ பலத்தைக் கொண்டு அச்சுறுத்தவில்லை. மாறாக, அமெரிக்காவின் பாரம்பரிய நட்பு நாடுகளையும் இலக்கில் வைக்கிறார். மில்லியன் கணக்கான புலம்பெயர்ந்தோரைக் கைது செய்து நாடு கடத்துவதன் மூலமாக, அமெரிக்காவிற்குள் அனைத்து சமூக மற்றும் அரசியல் எதிர்ப்புக்களை ஒடுக்குவதற்கும், ஒரு சர்வாதிகாரத்தை ஸ்தாபிப்பதற்கும் அவர் அடித்தளம் அமைத்து வருகிறார்.

ஜேர்மன் ஆளும் வர்க்கமும் இதேபோன்ற பாதையைப் பின்பற்றி வருகிறது. “அமெரிக்காவை மீண்டும் மகத்தானதாக்குவோம்” என்பதற்கு ஜேர்மன் ஆளும் வர்க்கத்தின் பதில், “அனைத்திற்கும் மேலாக ஜேர்மனி” என்பதாக இருக்கிறது. ஹிட்லருக்குப் பின்னர் பார்த்திராத வேகத்தில் ஜேர்மன் இராணுவத்தை மீள்ஆயுதபாணியாக்குவதன் மூலமாக ட்ரம்புக்கு ஜேர்மன் ஆளும் வர்க்கம் பதிலளிக்கிறது. கூட்டாட்சி பாராளுமன்றத்தில் (Bundestag) பிரதிநிதித்துவம் செய்யும் அனைத்துக் கட்சிகளும் இதில் ஒன்றுபட்டுள்ளன. ரஷ்யாவுக்கு எதிரான போரில், அவர்கள் ஓர் அணுஆயுத மோதல் அபாயத்தை எடுக்கத் தயாராக உள்ளனர். காஸாவில் இடம்பெற்றுவரும் இனப்படுகொலையை அவர்கள் ஆதரித்து வருகின்றனர். சமூக ஜனநாயகக் கட்சி (SPD) தலைமையிலான மதிப்பிழந்த கூட்டணி அரசாங்கத்தை விட, போர்க் கொள்கைகளையும் அதையொட்டிய சமூக வெட்டுக்களையும் மிகவும் திறம்பட செயல்படுத்தும் திறன் கொண்ட ஒரு அரசாங்கத்தை நிறுவுவதற்காக கூட்டாட்சி தேர்தல் முன்கூட்டியே கொண்டு வரப்பட்டுள்ளது.

இந்த தேர்தலில் “குறைந்த தீமை” என்று எதுவும் இல்லை. அனைத்து ஸ்தாபக கட்சிகளும் ஜேர்மனியை மீண்டும் “போருக்குத் தயார்” செய்யவும் செலவுகளை தொழிலாளர்கள், ஓய்வூதியம் பெறுவோர் மற்றும் ஏழைகள் மீது கட்டியடிக்கவும் பொறுப்பேற்றுள்ளன. வோல்க்ஸ்வாகன் ஆலையில் இடம்பெற்றுவரும் பாரிய பணிநீக்கங்களும், தீவிர ஊதிய வெட்டுக்களும் ஒரு ஆரம்பம் மட்டுமே.

அரசாங்கத்தின் பாகமாக இருந்தாலும் சரி இல்லாவிட்டாலும் சரி, தொழிலாள வர்க்கத்தின் மீதான இந்த நேரடித் தாக்குதலுக்கு, அவர்கள் அதிவலது ஜேர்மனிக்கான மாற்றீடு (AfD) கட்சியைச் சார்ந்துள்ளனர். இதர அனைத்து கட்சிகளும், ஏற்கனவே AfD இன் அகதிகள்-எதிர்ப்பு பிரச்சாரம் மற்றும் சட்டம்-ஒழுங்கு கொள்கைகளை ஏற்றுக்கொண்டுள்ளன. தொழிலாள வர்க்கத்தை பிளவுபடுத்துவதும், ஒரு வலதுசாரி கும்பலைத் தூண்டிவிடுவதும் மற்றும் ஒடுக்குமுறை அரசு எந்திரத்தைப் பலப்படுத்துவதுமே அவர்களின் இலக்காக உள்ளது.

ஸ்தாபகக் கட்சிகளுக்கு விடுக்கும் தார்மீக முறையீடுகள் மூலமாகவோ அல்லது அடிமட்டத்திலிருந்து கொடுக்கும் அழுத்தத்தின் மூலமாகவோ இக்கட்சிகளின் பாதையை மாற்றிக்கொள்ள முடியும் என்ற பிரமையை SGP நிராகரிக்கிறது. போர் ஆதரவு இனப்படுகொலைக் கொள்கைகள், சமூக சமத்துவமின்மையின் அப்பட்டமான அளவுகள், சுகாதாரம் மற்றும் கல்வி அமைப்புகளின் அழிவுகள் மற்றும் நமது பூமிக் கிரகத்தில் ஏற்பட்டுவரும் பேரழிவை ஏற்க மறுக்கும் அனைவருக்கும் எதிராக, எங்கள் தேர்தல் பிரச்சாரம் தொழிலாள வர்க்கத்தையும் இளைஞர்களையும் நோக்கி இயக்கப்படுகிறது.

3.5 பில்லியன் மக்களைக் கொண்டுள்ள சர்வதேச தொழிலாள வர்க்கம் ஒரு வலிமையான சமூக சக்தியாகும். இது, 1991 ஐ விட 55 சதவீதம் அதிகமாகும். இது, போர் மற்றும் நெருக்கடியின் ஒட்டுமொத்த சுமையையும் தாங்குகின்ற அதேவேளையில், அனைத்து சமூக செல்வங்களையும் உருவாக்குகிறது. தொழிலாள வர்க்கம் அரசியல் வாழ்க்கையில் சுயாதீனமாக தலையீடு செய்து, சமூகத்தை ஒரு புரட்சிகர அடித்தளத்தில் மாற்றினால் மட்டுமே (பெரிய வங்கிகள் மற்றும் பெருநிறுவனங்களின் சொத்துக்களைப் பறிமுதல் செய்து அவற்றை ஜனநாயகக் கட்டுப்பாட்டின் கீழ் வைத்தல்) பேரழிவைத் தடுக்க முடியும்.

அத்தகைய இயக்கம் ஏற்கனவே தொடங்கிவிட்டது. அமெரிக்காவில் இருந்து ஐரோப்பா, ஆசியா மற்றும் ஆபிரிக்கா வரையில், கடுமையான தொழில்துறை போராட்டங்கள் மேலெழுந்து வருகின்றன. அவை அதிகரித்தளவில் முதலாளித்துவ-சார்பு தொழிற்சங்க அதிகாரத்துவத்துடன் பகிரங்கமான மோதலுக்கு வருகின்றன. கொடூரமான அடக்குமுறை இருந்து வருகின்றபோதிலும், மில்லியன் கணக்கானவர்கள் காஸாவில் இனப்படுகொலைக்கு எதிராக எதிர்ப்புத் தெரிவித்துள்ளனர். இப்போராட்டங்களை சர்வதேச அளவில் ஐக்கியப்படுத்தி, ஒரு சோசலிச முன்னோக்குடன் ஆயுதபாணியாக்கி, ஒரு புதிய சோசலிச வெகுஜனக் கட்சியை கட்டியமைப்பதே மத்திய பணியாகும். இதுவே எங்கள் தேர்தல் பிரச்சாரத்தின் இலக்காகும்.

நாம் சர்வதேச சோசலிசத்திற்கு திரும்புவதற்காக போராடுகிறோம். நான்காம் அகிலத்தின் அனைத்துலகக் குழுவின் (ICFI) ஜேர்மன் பிரிவாக, ஒகஸ்ட் பெபல், ரோசா லக்சம்பர்க், கார்ல் லீப்க்னெக்ட், ரஷ்ய அக்டோபர் புரட்சி மற்றும் லியோன் ட்ரொட்ஸ்கி தலைமையிலான இடது எதிர்ப்பின் மார்க்சிச மரபில் நாங்கள் நிற்கிறோம். ஸ்ராலினிசத்திற்கு ஒரு சோசலிச மாற்றீடு இருந்தது என்பதற்கு வாழும் சான்றாக இடது எதிர்ப்பு நிற்கிறது. ஸ்ராலினிசம், சோசலிசத்தை பிரதிநிதித்துவம் செய்யவில்லை, மாறாக அதற்கு சவக்குழி தோண்டுபவராக சேவையாற்றுகிறது.

மூன்றாம் உலகப் போர் வேண்டாம்! உக்ரேன் போரையும், காஸாவில் இனப்படுகொலையையும் நிறுத்து!

எண்பத்தைந்து ஆண்டுகளுக்கு முன்பு, அழித்தொழிப்பு போரைத் தொடங்கிய நாஜி ஜேர்மனி, ஒட்டுமொத்த ஐரோப்பாவையும் இடிபாடுகளாக்கியதுடன், யூத இனப்படுகொலையில் பாதிக்கப்பட்ட 6 மில்லியன் யூதர்கள் உட்பட 80 மில்லியன் மக்களைப் பலிகொண்டது. இன்று, ஜேர்மன் ஏகாதிபத்தியம் மீண்டுமொருமுறை ரஷ்யாவுக்கு எதிராக போர் தொடுத்து வருகிறது. அது, இதுவரையில் 28 பில்லியன் யூரோ மதிப்புள்ள ஆயுதங்களை உக்ரேனுக்கு வழங்கியுள்ளதுடன், மனிதகுலத்தின் உயிர்வாழ்வை அச்சுறுத்திவரும் அணுஆயத யுத்த ஆபத்தில் ஆழ்த்தும் வகையில், ரஷ்யாவின் எல்லையில் இராணுவப் படைகளை நிலைநிறுத்தி வருகிறது.

சோசலிச சமத்துவக் கட்சி இந்த பைத்தியக்காரத்தனமான யுத்தக் கொள்கையை நிராகரிக்கிறது. உக்ரேனுக்கான ஆயுத விநியோகங்கள் உடனடியாக நிறுத்தப்பட வேண்டும், கிழக்கு ஐரோப்பாவில் இருந்து ஜேர்மன் இராணுவம் திரும்பப் பெறப்பட வேண்டும் மற்றும் நேட்டோ கலைக்கப்பட வேண்டும் என்று நாங்கள் கோருகிறோம். “ரஷ்ய ஆக்கிரமிப்பு போருக்கு” எதிராக நேட்டோ உக்ரேனை பாதுகாக்கிறது என்று கூறும் பொய்யான பிரச்சாரத்தை நாங்கள் நிராகரிக்கிறோம். யதார்த்தத்தில், பேர்லினும் வாஷிங்டனும் வேண்டுமென்றே இந்தப் போரைத் தூண்டியுள்ளன.

விளாடிமீர் புட்டின் மற்றும் அவரது வழிகாட்டியான போரிஸ் யெல்ட்சின் சோவியத் ஒன்றியத்தைக் கலைத்து, அதன் சமூக சொத்துக்களை குற்றகரமான தன்னலக்குழுக்களுக்கு விற்று, சோவியத் தொழிலாள வர்க்கத்தின் சமூக மற்றும் கலாச்சார சாதனைகளைத் தகர்த்தபோது, ஜேர்மன் உயரடுக்குகள் அவர்களை உற்சாகத்துடன் கொண்டாடின. நேட்டோ தனது கிழக்கு நோக்கிய விரிவாக்கத்தையும் ரஷ்யாவை சுற்றி வளைப்பதையும் தொடர்ந்தபோதுதான் புட்டின் கதாநாயகன் என்ற நிலையில் இருந்து வில்லனாக மாற்றப்பட்டார்.

கிழக்கு ஐரோப்பாவை, நேட்டோவிலும் ஐரோப்பிய ஒன்றியத்திலும் இணைக்க மாட்டோம் என்ற அவற்றின் அசல் வாக்குறுதிகளை மீறுவதுடன் திருப்தியடையாமல், ஜேர்மனியும் அமெரிக்காவும் இப்போது உக்ரேன் மற்றும் ஜோர்ஜியாவை இணைத்துக் கொள்ளவும், ரஷ்யாவை துண்டு துண்டாக்கி, அதன் பரந்த கனிம வளங்களை நேரடியாக கொள்ளையடிக்கவும் முனைகின்றன. 2014 இல், அவை கியேவில் இரண்டாம் உலகப் போரின் நாஜி ஒத்துழைப்பாளர்களை கதாநாயகர்களாக போற்றுகின்ற ஒரு வலதுசாரி, மேற்கத்திய-ஆதரவு ஆட்சியை அதிகாரத்திற்குக் கொண்டுவரவும் உதவின.

அப்போதிருந்து, நேட்டோ உக்ரேனிய இராணுவத்தை பாரியளவில் மறுஆயுதபாணியாக்கி வருகிறது. நேட்டோவை பின்வாங்க நிர்பந்திக்க முடியும் என்ற நம்பிக்கையில், உக்ரேனில் ஒரு இராணுவத் தலையீட்டைத் தொடங்கியதன் மூலம் புட்டின் இறுதியில் விடையிறுத்தார். ஆனால் நேட்டோ அனைத்து பேச்சுவார்த்தைகளையும் நிராகரித்ததுடன், அதற்கு பதிலாக ரஷ்யாவுக்கு எதிரான அதன் ஆயுதக் குவிப்பையும், அதன் மீதான தாக்குதலையும் தீவிரப்படுத்தியதுடன், இந்தப் போரை ஒரு சாக்குபோக்காக பயன்படுத்தியது.

ரஷ்ய ஆட்சிக்கும், உக்ரேன் மீதான அதன் பிற்போக்குத்தனமான படையெடுப்புக்கும் நாங்கள் உறுதியான எதிர்ப்பாளர்களாக இருக்கிறோம். எவ்வாறிருப்பினும், இந்த ஆட்சியை தூக்கியெறிவது என்பது ரஷ்ய மற்றும் சர்வதேச தொழிலாள வர்க்கத்தின் பணியாகும். நேட்டோவின் ஆதரவுடன் மாஸ்கோவில் அதிகாரத்திற்கு வரும் எந்தவொரு ஆட்சியும் கியேவில் இருந்த ஆட்சியைப் போலவே அதேயளவுக்கு பிற்போக்குத்தனமானதாகவே இருக்கும். அனைத்து அரசியல் எதிர்ப்புக்களையும் ஒடுக்கி வருகின்ற அதேவேளையில், நூறாயிரக்கணக்கான உக்ரேனிய ஆண்களை பீரங்கித் தீவனமாக ஆக்கிவருகின்ற ஜெலென்ஸ்கிக்கு நேட்டோ நிதியளித்து வருகிறது.

எமது உக்ரேனிய தோழர் போக்டன் சிரோடியுக் போரை நிராகரித்ததற்காகவும், உக்ரேனிய மற்றும் ரஷ்ய தொழிலாளர்களின் ஐக்கியத்தை ஆதரித்ததற்காகவும் ஒன்பது மாதங்களாக விசாரணையின்றி சிறையில் அடைக்கப்பட்டுள்ளார். போரின் எண்ணற்ற ஏனைய எதிர்ப்பாளர்களும் மற்றும் ஜெலென்ஸ்கி ஆட்சியை விமர்சிப்பவர்களும் இதேபோன்ற துன்புறுத்தல்களுக்கு முகங்கொடுத்து வருகின்றனர்.

சீனாவை முக்கிய இலக்காகக் கொண்டு, விரிவடைந்து வரும் மூன்றாம் உலகப் போரில் உக்ரேனிய போர் ஒரு போர்முனை மட்டுமே ஆகும். உலகின் மிகப்பெரிய பொருளாதார சக்தியாக சீனா தன்னை முந்திச் செல்வதை என்ன விலை கொடுத்தாவது தடுக்க அமெரிக்கா தீர்மானகரமாக உள்ளது. சூழ்ச்சிகளுக்காக பசிபிக் பகுதியில் போர்க்கப்பல்கள் மற்றும் போர் விமானங்களை நிலைநிறுத்துவதன் மூலம், சீனாவிற்கு எதிரான இராணுவக் கட்டமைப்பிற்கு பேர்லின் பங்களிப்பு செய்து வருகிறது.

மத்திய கிழக்கு மற்றொரு போர்முனையாகும். அமெரிக்கா மற்றும் ஜேர்மனியின் ஆதரவுடன், இஸ்ரேல் காஸாவில் உள்ள பாலஸ்தீனியர்களுக்கு எதிராக ஒரு கொடூரமான இனப்படுகொலையை செய்து வருகிறது. பாலஸ்தீனியர்களின் எதிர்ப்பு, ஏகாதிபத்திய சக்திகள் அப்பிராந்தியத்தின் மீது முழுமையான கட்டுப்பாட்டை கொண்டு வருவதுக்கு குறுக்கே நிற்கிறது.

இதற்கிடையில், அவர்கள் போரை லெபனான் மற்றும் ஏமனுக்கு விரிவுபடுத்தி, சிரியாவில் ஜிகாதிகளை அதிகாரத்திற்கு கொண்டு வந்துள்ளனர். ஏகாதிபத்திய சக்திகள் அல்-கொய்தாவின் வாரிசுகளைப் பயன்படுத்தி, ரஷ்யா மற்றும் சீனாவின் செல்வாக்கை அப்பிராந்தியத்தில் பின்னுக்குத் தள்ளி, ஈரானை தனிமைப்படுத்தி, போர் அச்சுறுத்தலை மேற்கொண்டு வருகின்றன.

காஸாவில் இடம்பெற்றுவரும் இனப்படுகொலையில் 45,000 பேர் உயிரிழந்துள்ளதாக காஸா சுகாதார அமைச்சகம் தெரிவித்துள்ளது. இருப்பினும், உண்மையான எண்ணிக்கை நான்கு மடங்கு அதிகம் என்று அறிவியல் ஆய்வுகள் மதிப்பிடுகின்றன. பாதிக்கப்பட்டவர்களில் மூன்றில் இரண்டு பங்கினர் பெண்கள், குழந்தைகள் மற்றும் முதியவர்கள் ஆவர். காஸாவின் 2.3 மில்லியன் மக்களில் தொண்ணூறு சதவிகிதத்தினர் தங்கள் வீடுகளில் இருந்து இடம்பெயர்ந்துள்ளனர்.

இஸ்ரேல் இனப்படுகொலை செய்து வருவதாக பல சர்வதேச நிறுவனங்கள் குற்றம் சாட்டியுள்ளன. சர்வதேச குற்றவியல் நீதிமன்றம் பிரதமர் நெதன்யாகு மற்றும் முன்னாள் பாதுகாப்பு அமைச்சர் யோவ் கேலன்ட் ஆகியோருக்கு கைது வாரண்ட் பிறப்பித்துள்ளது. ஜேர்மனியில் பாலஸ்தீனியர்களுக்கு அனுதாபம் காட்டும் எவரும் துன்புறுத்தலுக்கு ஆளாகிறார்கள்.

யூத-எதிர்ப்புவாதம் குறித்த பொய்யான குற்றச்சாட்டுக்கள், ஆர்ப்பாட்டங்களைத் தடை செய்வதற்கும், கருத்து சுதந்திரத்தை ஒடுக்குவதற்கும், விமர்சனரீதியான கல்வியாளர்கள் மற்றும் கலைஞர்களைத் தணிக்கை செய்வதற்கும், மற்றும் தனிநபர்கள் அவர்களின் தொழில்களைத் தொடர்வதைத் தடுப்பதற்கும் ஒரு சாக்குபோக்காக பயன்படுத்தப்பட்டு வருகின்றன. ஜேர்மனியில் போர் எதிர்ப்பாளர்கள் மீண்டுமொருமுறை சிறையில் அடைக்கப்படுவது வெறுமனே ஒரு கால விடயமாகும்.

உக்ரேனிய போர்க்களங்களில் நூறாயிரக்கணக்கான இளைஞர்களை பலியிடவும், பாலஸ்தீன அகதிகள் முகாம்கள் மீது குண்டுவீசவும் தூண்டும் அதே ஈவிரக்கமற்ற தன்மையுடன், நாளை மாஸ்கோ, தெஹ்ரான் அல்லது பெய்ஜிங் மீது அணு குண்டுகளை வீசவும் அவர்கள் ஒருபோதும் தயங்க மாட்டார்கள்.

• உக்ரேனில் நேட்டோ போரை நிறுத்து! பொருளாதாரத் தடைகளும் ஆயுத விநியோகங்களும் வேண்டாம்!
• காஸாவில் இனப்படுகொலையை நிறுத்து!
• இரண்டு உலகப் போர்கள் போதும்! போர் வெறியர்களை தடுத்து நிறுத்து!

பாரிய வேலைநீக்கங்கள், ஊதிய மற்றும் சமூக வெட்டுக்களை நிறுத்து!

போர்க் கொள்கையின் புதிய சகாப்தம் சமூகக் கொள்கையின் ஒரு புதிய சகாப்தத்துடன் நெருக்கமாக பிணைந்துள்ளது. தொழிலாள வர்க்கத்தின் மீது மீள்ஆயுதமயமாக்கலுக்கான பிரம்மாண்டமான செலவுகள் திணிக்கப்பட்டு, ஊதியங்கள், சமூக ஆதரவு மற்றும் ஜனநாயக உரிமைகள் என தொழிலாள வர்க்கம் பல தசாப்தங்களாக போராடி பெற்று வந்திருக்கும் அனைத்தும் தாக்குதலுக்கு உள்ளாகின்றன.

ஜேர்மனியின் இராணுவ வரவு-செலவு திட்டக்கணக்கு 2021 இல் 58 பில்லியன் யூரோவாக இருந்ததில் இருந்து 2024 இல் 86 பில்லியன் யூரோவாக அதிகரித்தது. அதேவேளையில், தற்போதைய கோவிட் பெருந்தொற்றுக்கு இடையிலும், அதே காலகட்டத்தில் சுகாதார வரவு-செலவு திட்டக்கணக்கு 64 பில்லியன் யூரோவில் இருந்து 16 பில்லியன் யூரோவாக குறைக்கப்பட்டது. கல்வி, வீட்டுவசதிகள் மீது இன்னும் கூடுதலான வெட்டுக்கள் செய்யப்பட்டுள்ளன. மத்தியிலுள்ள கூட்டாட்சி அரசாங்கத்தின் ஆதரவு குறைந்துள்ளதால் மாநிலங்களும், நகராட்சிகளும் கடுமையான வெட்டுக்களை எதிர்கொள்கின்றன. இதன் விளைவு வானளாவ உயரும் வாடகைகள், நொறுங்கும் பள்ளிகள், சுமை மிகுந்துள்ள மருத்துவமனைகள் அதிகமாகியுள்ளதுடன், பல கலாச்சார நிறுவனங்களும் அழிக்கப்பட்டு வருகின்றன.

வோல்ஸ்வாகன் ஆலையில் 35,000 வேலைகள் அழிக்கப்பட்டு 20 சதவீதம் வரை ஊதியங்கள் வெட்டப்பட்டு வருகின்ற நிலையில், கடுமையான ஆட்குறைப்பு அணுகுமுறை, தொழிலாள வர்க்கத்தின் மீதான முன்னணி தாக்குதலின் மிகவும் வெளிப்படையான வெளிப்பாடாகும். ஓப்பல், போர்ட், ஆடி, மெர்சிடஸ், (Opel, Ford, Audi, Mercedes) ஆகியவற்றின் விநியோகத் துறை மற்றும் இரசாயனப் பிரிவுகள் இதேபோன்ற திட்டங்களைத் தொடர்கின்றன. மில்லியன் கணக்கான வேலைகள், முழுப் பிராந்தியங்களின் எதிர்காலம், ஓய்வூதியங்கள், சுகாதாரப் பாதுகாப்பு, சமூக சேவைகள் மற்றும் கல்வி ஆகியவை ஆபத்தில் உள்ளன.

வேலைகள் மற்றும் ஊதியங்கள் மீதான கடுமையான தாக்குதல்கள் என்பன, மலைப்பூட்டும் செல்வக் கொழிப்பின் அதிர்ச்சியூட்டும் களியாட்டத்துடன் கைகோர்த்துள்ளன. பில்லியனர் தன்னலக் குழுக்கள் தொழிலாளர்களிடம் இருந்து முன்பினும் அதிக லாபத்தைப் பிழிந்தெடுக்கக் கோருகின்றனர். ஜூனில், வோல்ஸ்வாகன் அதன் பங்குதாரர்களுக்கு 4.5 பில்லியன் யூரோ விநியோகித்தது. இப்போது, அது நடைமுறைப்படுத்தியுள்ள சிக்கன நடவடிக்கைகள் மூலமாக அதன் இலாப வரம்பை 3.4 சதவீதத்தில் இருந்து 6.5 சதவீதத்திற்கு உயர்த்த நோக்கம் கொண்டுள்ளது.

கோவிட் பெருந்தொற்றின் காலத்தில் செறிவூட்டலின் களியாட்டம் துரிதப்படுத்தப்பட்டது. ஜேர்மனியில் கொரோனா வைரஸால் கிட்டத்தட்ட 200,000 பேர் இறந்துள்ளனர். “உயிர்களுக்கு முன் இலாபம்” என்ற கொள்கை காரணமாக மில்லியன் கணக்கானவர்கள் நோயின் நீண்டகால விளைவுகளுடன் போராடி வருகின்றனர். மேலும், நிதியுதவி இல்லாத மருத்துவமனைகளில் செவிலியர்கள் வேலையிழந்து வருகின்றனர். இதற்கிடையில், பெரும் பணக்காரர்கள் தங்கள் செல்வத்தை வியத்தகு முறையில் பாரியளவில் அதிகரித்துள்ளனர்.

2021 முதல், ஜேர்மனியில் மில்லியனர்களின் எண்ணிக்கை 73 சதவீதம் அதிகரித்து, அவர்களது வருமானம் 1.6 மில்லியனில் இருந்து 2.8 மில்லியனாக உயர்ந்துள்ளது. அதே காலகட்டத்தில், ஐந்து பணக்கார ஜேர்மனியர்கள் தங்கள் செல்வத்தை 89 பில்லியன் டாலர்களிலிருந்து 155 பில்லியன் டாலர்களாக அதிகரித்துள்ளனர். இதற்கிடையே, ஜேர்மனியில் வறுமையில் வாழ்ந்துவரும் 17.5 மில்லியன் மக்கள், தொடர்ந்து அதிகரித்து வரும் வாடகைகளுடன் போராடி வருகின்றனர். மேலும் 10.5 மில்லியன் தொழிலாளர்கள் ஒரு மணி நேரத்திற்கு 15 யூரோக்களுக்கும் குறைவான ஊதியத்தையே பெறுகிறார்கள்.

மனிதயினத்தை பேரழிவில் மூழ்கடித்து, தங்கள் இலாபங்களை அதிகபட்சமாக்க எதையும் செய்யத் தயங்காத தன்னலக்குழுக்களை சமூகம் இனியும் பொறுத்துக் கொண்டிருக்க முடியாது. ஒரு உலகப் போரைத் தடுக்கவும், சமூக சமத்துவத்தை நிலைநாட்டவும், பெரிய வங்கிகளும் பெருநிறுவனங்களும் பறிமுதல் செய்யப்பட்டு ஜனநாயகக் கட்டுப்பாட்டின் கீழ் கொண்டுவரப்பட வேண்டும்.

அத்தகைய சோசலிச வேலைத்திட்டத்தை, வர்க்கப் போராட்டம் மற்றும் தொழிலாள வர்க்கத்தின் சர்வதேச அணிதிரட்டல் மூலம் மட்டுமே அடைய முடியும். இந்த பூமிக் கிரகத்தின் மிக சக்திவாய்ந்த மற்றும் குறிப்பிடத்தக்க சமூக சக்தியான சர்வதேச தொழிலாள வர்க்கமே, முதலாளித்துவ சமூகத்தின் அனைத்து மதிப்பிற்கும் ஆதாரமாக உள்ளது. ஆயினும், அதன் அதிகாரம் திட்டமிட்டு மௌனமாக்கப்பட்டு ஒடுக்கப்படுகிறது.

இந்த விஷயத்தில், தொழிற்சங்கங்கள் முக்கிய பங்கு வகிக்கின்றன. ஜேர்மன் தொழிற்சங்க கூட்டமைப்பும் (DGB) மற்றும் அதன் துணை அமைப்புகளான IG Metall மற்றும் Verdi போன்றவையும் அரசாங்கத்தின் போர்-ஆதரவு கொள்கைகளை முழுமையாக ஆதரிக்கின்றன. அவர்களின் நல்ல ஊதியம் பெறும் நிர்வாகிகளும் பெருநிறுவன தொழிலாளர் மன்ற பிரதிநிதிகளும் பங்குதாரர்கள் மற்றும் நிர்வாகத்தின் பக்கம் நிற்கிறார்கள். அவர்கள் வெவ்வேறு ஆலைகள் மற்றும் நாடுகளைச் சேர்ந்த தொழிலாளர்களை ஒருவருக்கு எதிராக ஒருவரை நிறுத்துகிறார்கள். மேலும், குறைந்த செலவுகள் மற்றும் அதிக இலாபங்களுக்கான உலகளாவிய போட்டியில் “தங்கள்” இடத்தை போட்டித்தன்மையுடன் வைத்திருக்க எந்த சலுகையையும் வழங்க தயாராக உள்ளனர். வோக்ஸ்வாகனில், ஐஜி மெட்டாலும், தொழிலாளர் மன்றமும் வெட்டுக்களை ஆதரித்து, அவற்றை “கிறிஸ்துமஸ் அதிசயம்” என்று சிடுமூஞ்சித்தனமாக கொண்டாடுகின்றன.

வேலைகள், ஊதியங்கள் மற்றும் உரிமைகளைப் பாதுகாக்க, தொழிலாளர்கள் தொழிற்சங்க அதிகாரத்துவத்தில் இருந்து சுயாதீனமாக ஒழுங்கமைக்கப்பட்டு சர்வதேச அளவில் ஐக்கியப்பட வேண்டும். சாமானிய தொழிலாளர்களால் கட்டுப்படுத்தப்படும் மற்றும் அவர்களுக்கு மட்டுமே பொறுப்புக் கூறக் கூடிய நடவடிக்கை குழுக்களை ஸ்தாபிக்குமாறு நாம் அழைப்பு விடுக்கின்றோம். இந்தக் குழுக்கள் அனைத்து இடங்களிலும் உள்ள அனைத்து வேலைகளையும் கொள்கை அடிப்படையில் பாதுகாக்க வேண்டும் மற்றும் ஊதியங்கள், சமூக நலன்கள் மீதான எந்தவொரு தாக்குதலையும் எதிர்க்க வேண்டும்.

இந்தப் போராட்டம் சர்வதேச அளவில் நடத்தப்பட வேண்டும். நடவடிக்கைக் குழுக்கள் தொழிலாளர் தொகுப்பிற்குள் உள்ள பிளவுகளை (நிரந்தர மற்றும் தற்காலிக ஊழியர்களுக்கு இடையே, வெவ்வேறு இடங்களுக்கு இடையே, மற்றும் வாகன பிராண்டுகளுக்கு இடையே) கடந்து, பிற ஆலைகள், நிறுவனங்கள் மற்றும் நாடுகளில் நடவடிக்கைக் குழுக்களுடன் வலையமைப்புகளை ஸ்தாபிக்க வேண்டும். இந்த நோக்கத்திற்காக, சாமானிய தொழிலாளர் குழுக்களின் சர்வதேச தொழிலாளர் கூட்டணியை (IWA-RFC) நாங்கள் ஸ்தாபித்துள்ளோம்.

• படைக்கலங்களுக்கு ஒரு பைசாவும் இல்லை! ஆயுதங்கள் மற்றும் போருக்குப் பதிலாக சுகாதாரம் மற்றும் கல்வி!
• அனைத்து வேலைகளையும் பாதுகாப்போம்! சுயாதீன நடவடிக்கை குழுக்களை கட்டியெழுப்பு!
• நில உரிமையாளர்கள், எரிசக்தி நிறுவனங்கள் மற்றும் போர்க் கொள்ளை லாபவெறியர்களின் உடமைகளை இழப்பீடு இல்லாமல் பறிமுதல் செய்!

மீண்டும் ஒருபோதும் பாசிசம் வேண்டாம்! ஒரு ஐக்கியப்பட்ட சோசலிச ஐரோப்பாவிற்காக!

உலகின் மிகப் பெரிய பணக்காரரும், டெஸ்லா தலைமை நிர்வாக அதிகாரியுமான எலோன் மஸ்க், மற்றும் டொனால்ட் ட்ரம்ப் போன்ற ஆர்ஜென்டினாவின் ஜேவியர் மிலே, இத்தாலியின் ஜியோர்ஜியா மெலோனி, ஜேர்மனியின் ஆலிஸ் வைடல் மற்றும் சீர்திருத்த இங்கிலாந்து கட்சியின் நைஜல் ஃபராஜ் போன்ற பிரமுகர்களுக்கு இடையிலான கூட்டணியானது, மூலதனத்திற்கும் பாசிசத்திற்கும் இடையிலான உறவை எடுத்துக்காட்டுகிறது.

அனைத்து சமூகத் தேவைகளையும் தங்கள் கட்டுப்பாடற்ற செல்வக் குவிப்பிற்கும், போர்க் கோரிக்கைகளுக்கும் அடிபணியச் செய்து, இந்த இலக்குகளுக்கான எந்தத் தடைகளையும் அகற்றுவதற்கு, தன்னலக்குழுக்களுக்கு பாசிசவாதிகள் அவசியமாகும்.

அரசினது செயற்பாட்டை, அதன் ஒடுக்குமுறை கருவிகளான போலிஸ், இரகசிய சேவைகள், மற்றும் இராணுவம் போன்றவற்றின் ஒடுக்குமுறை செயல்பாடுகளுக்குள் குறைக்கப்பட உள்ளது. அதேவேளையில் கல்வி, சுகாதாரம் மற்றும் உள்கட்டமைப்பு போன்ற சமூக செயல்பாடுகள் தனியார்மயமாக்கப்பட உள்ளன அல்லது, சமூக நலன்புரி, செவிலியர் பராமரிப்பு, ஓய்வூதியங்கள் மற்றும் சுற்றுச்சூழல் பாதுகாப்பு என்பன ஒட்டுமொத்தமாக அகற்றப்பட உள்ளன. அமெரிக்காவில் புதிதாக உருவாக்கப்பட்ட அரசாங்க செயல்திறன் துறையின் தலைவரான எலன் மஸ்க், வரவு-செலவுத் திட்டத்தை 2 டிரில்லியன் டாலர்கள் குறைத்து, ட்ரம்பின் சார்பாக லட்சக்கணக்கான வேலைகளை நீக்கும் பணியை மேற்கொண்டுள்ளார்.

ஐரோப்பாவில், இந்த நோக்கத்திற்காக பாசிசக் கட்சிகள் அதிகரித்தளவில் அரசாங்கங்களுக்குள் இணைக்கப்பட்டு வருகின்றன. இத்தாலியில், ஜியோர்ஜியா மெலோனி அதிகாரத்தில் உள்ளார்; பிரான்சில், ஜனாதிபதி மக்ரோன் அதிவலது மரின் லு பென்னை நம்பியுள்ளார்; நெதர்லாந்தில், கீர்ட் வைல்டர்ஸ் அரசாங்கத்தில் ஆதிக்கம் செலுத்துகிறார்; ஆஸ்திரியாவில், பாசிச ஹெர்பர்ட் கிக்ல் அதிபராக வரவுள்ளார்.

ஜேர்மனியில், போர் மற்றும் சமூக சீரழிவுக்கான எதிர்ப்பை ஒடுக்குவதற்காக, அதி தீவிர வலதுசாரி AfD கட்சி கட்டியெழுப்பப்பட்டு ஊக்குவிக்கப்பட்டு வருகிறது. ஸ்தாபகக் கட்சிகள் AfD இன் வேலைத்திட்டத்தின் முக்கிய கூறுகளை ஏற்றுக் கொண்டு, அவற்றை செயலூக்கத்துடன் நடைமுறைப்படுத்தி வருகின்றன. அவர்கள் மறுஆயுதபாணியாகி, காஸாவில் இனப்படுகொலையை ஆதரித்து, எதிர்ப்புக்களை மௌனமாக்க சர்வாதிகார வழிவகைகளை நாடுகின்றனர். புலம்பெயர்ந்தவர்கள் தொடர்பான கொள்கையில், வலதுசாரி பிரச்சாரத்துடன் ஒருவரையொருவர் விஞ்சுவதற்கு அவர்கள் போட்டியிட்டு வருகின்றனர்.

சாக்சோனி மாநிலத்தில், இடது கட்சி மற்றும் அதன் புலம்பெயர்ந்தோர் எதிர்ப்பு பிளவுபட்ட குழுவான BSW ஆல் ஆதரிக்கப்படும் கிறிஸ்தவ ஜனநாயகக் கட்சியினர் மற்றும் சமூக ஜனநாயகக் கட்சியினர், முதல் முறையாக வழக்கமான ஆலோசனைகள் மூலம் மாநில அரசாங்கத்தின் பணிகளில் AfD-ஐ சேர்த்துள்ளனர். மேலும், முதல் முறையாக, ஒரு முக்கிய நாளிதழான Welt am Sonntag, அதன் முதல் பக்கத்தில் எலோன் மஸ்க் எழுதிய AfD-க்கான தேர்தல் ஆதரவு வேண்டுகோளை வெளியிட்டுள்ளது.

பாசிசத்திற்கு எதிரான போராட்டத்திற்கு அனைத்து ஸ்தாபக கட்சிகளையும் எதிர்ப்பது அவசியமாகும் என்பதோடு, அது பிரிக்கவியலாமல் ஒரு பாரிய சோசலிச இயக்கத்தைக் கட்டியெழுப்புவதுடன் பிணைந்துள்ளது. பாசிசவாதிகளின் தேசியவாத நஞ்சூட்டல் மற்றும் புலம்பெயர்ந்தோர்-விரோத கிளர்ச்சிக்கு எதிராக தொழிலாள வர்க்கத்தின் சர்வதேச ஐக்கியத்தை நாங்கள் முன்நிறுத்துகிறோம். அரசாங்கத்தின் போர் மற்றும் சமூக செலவின குறைப்புக் கொள்கைகளால் உருவாக்கப்பட்டுள்ள சமூகப் பேரழிவுக்கு அகதிகளும் புலம்பெயர்ந்தவர்களும் பொறுப்பல்ல. அவர்களே தொழிலாள வர்க்கத்தின் ஒரு ஒருங்கிணைந்த பாகமாக உள்ளனர்.

வங்கிகள் மற்றும் பெருநிறுவனங்களின் ஐரோப்பிய ஒன்றியத்தையும், பாரிய இறப்பு மற்றும் போரையும் எதிர்த்து, ஐக்கிய ஐரோப்பிய சோசலிச அரசுகள் மற்றும் ஐரோப்பிய தொழிலாள வர்க்கத்தின் ஐக்கியத்துக்கான முன்னோக்குடன், வங்கிகள் மற்றும் பெருநிறுவனங்களின் சக்தியை உடைத்தெறிய வேண்டும். ஒருவருக்கொருவர் சண்டையிடுவதற்குப் பதிலாக, ரஷ்ய மற்றும் உக்ரேனிய தொழிலாளர்கள் அந்தந்த நாடுகளில் உள்ள போர் வெறியர்களுக்கு எதிராக ஐக்கியப்படுமாறு நாங்கள் அழைப்பு விடுக்கிறோம்.

• வங்கிகள் மற்றும் பெருநிறுவனங்களின் ஐரோப்பிய ஒன்றியத்திற்கு எதிராக, பாரிய மரணங்கள் மற்றும் போருக்கு எதிராக! ஐக்கிய ஐரோப்பிய சோசலிச அரசுகளுக்காக!
• ஜனநாயக உரிமைகளைப் பாதுகாப்போம்!
• புலம்பெயர்ந்தோருக்கும் அகதிகளுக்கும் சம உரிமை!

தொழிலாளர்களுக்கு அவர்களின் சொந்த கட்சி தேவை!

பாராளுமன்றத்தில் உள்ள எந்தக் கட்சியும் தொழிலாள வர்க்கத்தின் நலன்களை மிகவும் அடிப்படையான வழியில் கூட பிரதிநிதித்துவப்படுத்துவதில்லை. இவை அனைத்துமே முதலாளித்துவ அமைப்புமுறையைப் பாதுகாப்பதுடன், அதன் அணிகளை மூடுவதன் மூலமும், மேலும் வலதுபுறம் நகர்வதன் மூலமும் அதன் நெருக்கடிக்கு பதிலளிக்கின்றன.

தொழிலாளர்களின் கட்சியாக இருந்த சமூக ஜனநாயகக் கட்சி (SPD) பல தசாப்தங்களுக்கு முன்னரே அதன் வேர்களைக் கைவிட்டுள்ளது. அதிபர் ஹெகார்ட் ஷ்ரோடரின் கீழ், ஜேர்மன் இராணுவத்தின் முதல் இராணுவ படையெடுப்பை SPD மேற்பார்வையிட்டது. மேலும், நிகழ்ச்சி நிரல் 2010 என்ற நலன்புரி மற்றும் தொழிலாளர் “சீர்திருத்தங்கள்” மூலம், போருக்குப் பிந்தைய கூட்டாட்சி குடியரசு நிறுவப்பட்டதிலிருந்து மிகவும் விரிவான சமூக வெட்டுக்களைத் SPD தொடங்கியது.

சான்சிலர் ஓலாவ் ஷொல்ஸின் கீழ், SPD அதன் போர்க் கொள்கையில் ஒரு “புதிய சகாப்தத்தை” அறிவித்ததுடன், தொழிற்சங்கங்களுடனான நெருக்கமான ஒத்துழைப்புடன், நிஜமான ஊதியங்களை கடுமையாக குறைத்தது. முன்னாள் பிளாக் ராக் (BlackRock) மேலாளரும் கிறிஸ்தவ ஜனநாயக ஒன்றியத்தின் (CDU) தலைவரும் அதிபர் வேட்பாளருமான பிரீட்ரிக் மெர்ஸின் கீழ் இந்தப் பாத்திரத்தை தொடர SPD தயாராக உள்ளது.

பசுமைக் கட்சி எப்போதும் வசதியான நகர்ப்புற மத்தியதர வர்க்க அடுக்குகளைப் பிரதிநிதித்துவப்படுத்தும் கட்சியாக இருந்து வருகிறது. 1980 களின் ஆரம்பத்தில் இந்தக் கட்சி நிறுவப்பட்டபோது, அமைதிவாதம் மற்றும் சுற்றுச்சூழல்வாதத்தை அது வெளிப்படுத்திக் காட்டியது. எவ்வாறிருப்பினும், அவர்களின் செல்வந்த வாடிக்கையாளர்களின் வர்க்க நலன்கள் இப்போது எஞ்சியிருக்கும் சமாதானவாத மன உறுத்தல்களையும் விட வெற்றி பெற்றுள்ளன.

பசுமைக் கட்சியின் சான்சிலர் வேட்பாளர் ரோபர்ட் ஹாபெக் பாதுகாப்புத்துறை வரவு-செலவு திட்டக்கணக்கை மும்மடங்காக்க அழைப்பு விடுத்து வருகிறார். இதற்கிடையில், பசுமைக் கட்சித் தலைவர் அன்னலெனா பேர்போக்கின் “பெண்ணிய வெளியுறவுக் கொள்கையானது” பாலஸ்தீனிய பெண்கள் மற்றும் குழந்தைகள் மீதான படுகொலைக்கு ஆதரவளிப்பதிலும், சவூதி அரேபியாவின் முகமது பின் சல்மான் மற்றும் சிரியாவின் புதிய இஸ்லாமிய ஆட்சியாளர்களுக்கு முன்பாக அரசியல் ரீதியாக மண்டியிடுவதிலும் உச்சத்தை அடைந்துள்ளது.

இடது கட்சி, அதன் கூட்டாட்சி கட்சி மாநாட்டில், அதன் கடைசி அமைதிவாத பாசாங்குத்தனங்களையும் கைவிட்டு, உக்ரேனுக்கு ஆயுதம் வழங்குவதற்கும் மற்றும் இஸ்ரேலின் “தற்காப்புக்கான உரிமைக்கும்” ஒப்புதல் அளித்தது. முன்னாள் கிழக்கு ஜேர்மனியின் ஸ்ராலினிச அரசுக் கட்சியில் இருந்து வெளிப்பட்ட இது, சாதாரண தொழிலாளர்கள் மீதான அடக்குமுறை அரச எந்திரத்தின் செறிவான இகழ்வின் உருவகமாக உள்ளது. மாநில அரசாங்கங்களில் எங்கெல்லாம் அது பங்கேற்கிறதோ, அங்கெல்லாம் இதர முதலாளித்துவ கட்சிகளைப் போலவே, அதே பிற்போக்குத்தனமான கொள்கைகளையே அது செயல்படுத்தி வருகிறது. அதன் சகோதரக் கட்சிகளான கிரேக்கத்தில் சிரிசாவும் ஸ்பெயினில் பொடெமோஸும், ஐரோப்பிய ஒன்றியத்தில் பாரிய எதிர்ப்பையும் மீறி சிக்கன நடவடிக்கைகள் மற்றும் போர் ஆதரவுக் கொள்கைகளை முன்னெடுத்துள்ளன.

சாரா வாகன்க்னெக்டின் பிரிந்து சென்ற கட்சியான BSW, இராணுவ எதிர்ப்புடன் எந்த தொடர்பும் கொண்டிருக்கவில்லை. ரஷ்யாவுக்கு எதிரான போரை ஒரு தேசியவாத நிலைப்பாட்டில் இருந்து விமர்சனம் செய்யும் BSW, அமெரிக்காவில் இருந்து சுயாதீனமாக செயல்பட ஜேர்மன்-ஐரோப்பிய மீள்ஆயுதமயமாக்கலுக்கு வாதிடுகிறது. சிதைந்து வரும் முதலாளித்துவ அமைப்புமுறையை ஸ்திரப்படுத்துவதும் அதிகரித்து வரும் எதிர்ப்பை தேசியவாத பாதைகளுக்குள் திசைதிருப்புவதுமே வாகென்கினெக்ட்டின் இலக்காகும். அகதிகளுக்கு எதிரான அவரது கிளர்ச்சி AfD இன் துர்நாற்றத்தைத் தாங்கி நிற்கிறது.

வங்குரோத்தான முதலாளித்துவ அமைப்பு முறைமையை தூக்கி வீச தொழிலாள வர்க்கத்திற்கு அதன் சொந்த பாரிய சோசலிச கட்சி தேவைப்படுகிறது. இந்த முன்னோக்குடன் உடன்படும் அனைவரையும் நாங்கள் அழைக்கிறோம்: இந்த வேண்டுகோளை சாத்தியமான அளவுக்கு பரவலாக பகிர்ந்து கொள்ளுங்கள், எங்களது நிகழ்வுகள் மற்றும் பேரணிகளுக்கு வாருங்கள், எங்கள் தேர்தல் பிரச்சாரத்திற்கு தாராளமாக நன்கொடைகளை வழங்குங்கள், அதை தீவிரமாக ஆதரித்து எங்கள் கட்சியின் உறுப்பினராகுங்கள்!

வறுமை, ஒடுக்குமுறை மற்றும் ஒரு மூன்றாம் உலகப் போருக்கு எதிரான போராட்டம், உலகெங்கிலும் சோசலிசத்திற்கான போராட்டமாகும்!