மொழிபெயர்ப்பின் மூலக் கட்டுரையை இங்கே காணலாம். 

உலகின் இரண்டாவது மிகப்பெரிய பொருளாதாரமான சீனப் பொருளாதாரத்தின் தற்போதைய குழப்பம், ஒரு நீண்ட-கால பணவாட்ட (deflation) சுழற்சிக்கு இட்டுச் செல்லக்கூடும் என்ற ஆழ்ந்த கவலைகளுடன் புத்தாண்டு தொடங்கியுள்ளது, இது வரவிருக்கும் அமெரிக்க ஜனாதிபதி ட்ரம்ப் அச்சுறுத்தும் வரிவிதிப்பு நடவடிக்கைகளால் மேலும் சிக்கலாக்கப்பட உள்ளது.

11 டிரில்லியன் டாலர் அரசாங்க பத்திர சந்தையில் ஆதாயங்கள் கூர்மையாக வீழ்ச்சியடைந்திருப்பது, பெருகிவரும் நீண்டகால பிரச்சினைகளின் தெளிவான சான்றாக இருக்கிறது. முதலீட்டாளர்கள் பத்திரங்களில் முதலீடு செய்வது, அவைகளின் விலையை உயர்த்துவதன் மூலம் மற்றும் அவைகளின் மூலம் ஆதாயத்தைக் குறைப்பதற்கு வழிவகுக்கிறது (இவை இரண்டும் தலைகீழ் உறவைக் கொண்டுள்ளன), இது எதிர்காலத்தில் குறைந்த வளர்ச்சி மற்றும் பணவாட்ட நிலைமைகளை அவைகள் ஏற்படுத்தும் என்பதற்கான ஒரு அறிகுறியாக இருக்கிறது.

2013 இல் 5 சதவீதத்திற்கும் சற்று குறைவாக இருந்த 10 ஆண்டு அரசாங்க பத்திரத்தின் ஆதாயம், இந்த வாரம் வர்த்தகம் தொடங்கியபோது 1.6 சதவீதத்திற்கும் குறைவாக வீழ்ச்சியடைந்தது. இப்போது சீன மற்றும் அமெரிக்க பத்து ஆண்டு பத்திரங்களுக்கு இடையே 300 அடிப்படை புள்ளிகள் (3 சதவீத புள்ளிகள்) இடைவெளி உள்ளது.

பணவாட்ட (deflation) போக்கின் தீவிரம் நேற்று வெளியான மாதாந்திர விலைப் புள்ளிவிவரங்களால் வலியுறுத்தப்பட்டது. டிசம்பர் மாத நுகர்வோர் விலை வளர்ச்சி, முந்தைய ஆண்டை விட 0.1 சதவிகிதமாக உயர்ந்துள்ளது; இது நவம்பர் மாதத்தில் பதிவான 0.2 சதவிகித உயர்வை விடக் குறைவானது. கடந்த 28 மாதங்களாக பணவாட்ட நிலையில் உள்ள உற்பத்தியாளர் விலைகுறியீடு, ஆலை வாயிலில் 2.3 சதவீதம் வீழ்ச்சியடைந்துள்ளது.

“2008 உலகளாவிய நிதியியல் நெருக்கடி மற்றும் கோவிட் பெருந்தொற்று நோயின் போது எட்டப்பட்ட மட்டங்களை விட சீன ஆதாயங்களை மிகவும் குறைவாக இழுத்துச் சென்றுள்ள இந்த வீழ்ச்சி, பல தசாப்தங்களாக நீடிக்கக்கூடிய ஒரு பொருளாதார நோய்க்குள் சீனா சரிவதைத் தடுக்க கொள்கை வகுப்பாளர்கள் தவறிவிடுவார்கள் என்ற கவலையை அடிக்கோடிட்டுக் காட்டுகிறது” என்று புதன்கிழமை வெளியிடப்பட்ட பத்திர சந்தைக் குறித்த ஒரு அறிக்கையில், புளூம்பேர்க் (Bloomberg) கருத்துரைத்துள்ளது.

1990 களின் தொடக்கத்தில் ஜப்பானில் சொத்து மற்றும் மனைக்கட்டுமான குமிழியின் சரிவு பல தசாப்தங்களாகத் தேக்க நிலைக்கு வழிவகுத்திருந்தது, அதிலிருந்து நாடு உண்மையில் ஒருபோதும் மீளவில்லை. அதனால் அங்கு என்ன நடந்தது என்ற ஒப்பீடுகள் வரையப்படுகின்றன.

சீனாவின் பத்து மிகப்பெரிய பங்குத் தரகு நிறுவனங்கள் அனைத்தும் ஜப்பானின் “இழந்த தசாப்தங்கள்” குறித்த ஆராய்ச்சியை உருவாக்கியிருந்தன என்பது குறிப்பிடத்தக்கது என்று ப்ளூம்பேர்க் அறிக்கை குறிப்பிட்டுள்ளது.

சீனாவின் நிலைமை இன்னும் மோசமாக உள்ளது. இதற்குக் காரணம் அதன் பெரிய அளவு மற்றும் கடந்த பதினைந்து ஆண்டுகளில் வளர்ச்சியின் முக்கிய இயந்திரமாக உலகப் பொருளாதாரத்தில் அதன் பங்கு இருப்பதாகும்.

அமெரிக்காவால் நடைமுறைப்படுத்தப்பட்ட சீன-விரோத நடவடிக்கைகளால் தூண்டிவிடப்பட்ட இப்போது நிலவும் பொருளாதார போரால் அதன் பிரச்சினைகள் மேலும் மோசமடைந்துள்ளன. அனைத்து சீனச் சரக்குகள் மீதும் 60 சதவீத வரிவிதிப்பு உயர்வைத் திணிக்க அச்சுறுத்தியுள்ள ட்ரம்ப் நிர்வாகத்தால் இவை தீவிரமடையவிருக்கின்றது.

சீனச் சந்தைகள் 2025 இல் “கத்தி முனையில்” இருந்துகொண்டு நுழைந்துள்ளதாக புளூம்பேர்க் அறிக்கை குறிப்பிட்டுள்ளது.

இது பத்திர ஆதாயங்களின் வீழ்ச்சியில் மட்டுமல்ல, பங்குச் சந்தையின் தொடர்ச்சியான வீழ்ச்சியிலும் வெளிப்படுத்தப்படுகிறது. சீன பத்திரங்கள் அட்டவணைக் (CSI 300) குறியீடு இந்த ஆண்டின் தொடக்கத்திலிருந்து சுமார் 4 சதவீதம் குறைந்துள்ளது, 2021 இல் அதன் உயர்விலிருந்து 30 சதவீதத்திற்கும் அதிகமாக இழந்துள்ளது. ரென்மின்பி (renminbi) நாணயத்தின் கடல்கடந்த மதிப்பு கிட்டத்தட்ட வரலாறு காணாத அளவிற்கு வீழ்ச்சி அடைந்துள்ளது.

செலாவணியின் மதிப்பிலான வீழ்ச்சி என்பது ட்ரம்ப் முன்னறிவித்த வரிவிதிப்பு நடவடிக்கைகளின் நேரடி விளைவாகும், அதனை மத்திய வங்கி தடுத்து நிறுத்த அழுத்தம் கொடுத்து வருகிறது. ஏற்றுமதிகளை மலிவாக்குவதன் மூலமாக ட்ரம்ப் நடவடிக்கைகளின் விளைவை எதிர்கொள்ள நிதியியல் அதிகாரிகள் ரென்மின்பியின் உத்தியோகபூர்வ மதிப்பைக் குறைக்க வேண்டியிருக்கும் என்பதே சந்தைகளின் கண்ணோட்டமாக உள்ளது.

எவ்வாறெனினும், நாணயத்தின் எந்தவொரு மதிப்பிறக்கமும் சீனாவிலிருந்து மூலதன வெளியேற்றத்தை தூண்டிவிடும் என்று அஞ்சுவதால் இந்த நிலைப்பாட்டை நிறுத்த மத்திய வங்கி முயற்சிக்கிறது.

திங்களன்று (06-01-2025) வெளியிடப்பட்ட ஒரு அறிக்கையில், தினசரி உத்தியோகபூர்வ மாற்று விகிதத்தை நிர்ணயிக்கும் மத்திய வங்கி, அது “பரிவர்த்தனை மிகைப்படுத்தல் அபாயத்திற்கு எதிராக உறுதியாகப் பாதுகாக்கும் மற்றும் ரென்மின்பியின் அடிப்படை நிலைத்தன்மையைப் பராமரிக்கும்” என்று கூறியது.

“பல சுற்று மதிப்பிடல் மற்றும் தேய்மானம்” ஆகிய அனுபவம் இதைச் செய்ய “போதுமான” கருவிகளைக் கொண்டிருப்பதைக் காட்டுகிறது என்று அது கூறியது.

மூலதனம் வெளியே செல்லும் என்பது பற்றிய கவலைகளைத் தவிர, மத்திய வங்கி ரென்மின்பியின் மதிப்பு சரிந்தால், அதையொட்டி சீனப் பொருட்கள் உலகச் சந்தைகளில் மலிவாகிவிட்டால், இது அமெரிக்காவிடம் இருந்தும் ஐரோப்பாவில் இருந்தும் இன்னும் தாக்குதல்களைத்தான் கொண்டுவரும் என்று அஞ்சுகிறது.

ஆனால் மத்திய வங்கியின் அறிக்கைகள் இருந்தபோதிலும் ஒரு மதிப்பிறக்கத்திற்கான நிதியியல் சந்தைகளின் அழுத்தம் தொடர்கிறது.

ஷாங்காய் மற்றும் ஷென்ஜென் ஆகிய இரண்டு முக்கிய பங்குச் சந்தைகளின் பிரதான அதிகாரிகளும் தலையீடு செய்துள்ளதாக பைனான்சியல் டைம்ஸ் தகவல் கொடுத்துள்ளது. சீனாவின் பொருளாதாரம் “உறுதியான அடிப்படைகள் மற்றும் நெகிழ்திறனால்” மேற்கொள்ளப்படுகின்றன என்று முதலீட்டாளர்களுக்கு உறுதியளிக்க அவர்கள் கடந்த வார இறுதியில் கூட்டங்களை நடத்தியுள்ளனர்.

ஆனால் அத்தகைய உத்தரவாதங்கள் எந்த மாற்றத்தையும் ஏற்படுத்தப்போவதில்லை. நிதி மூலதனத்தின் உலகில் மேலோங்கி வரும் கருத்து என்னவென்றால், நுகர்வு செலவினங்களை அதிகரிப்பதன் மூலம் உள்நாட்டுப் பொருளாதாரத்தை உயர்த்துவதற்கு அரசாங்கம் இதுவரை எடுத்ததைவிட இன்னும் தீவிரமான நடவடிக்கைகளை எடுக்க வேண்டும் என்பதாகும்.

கடந்த சில மாதங்களில் நாணயக் கொள்கையைத் தளர்த்துதல், உள்ளூர் அரசாங்கங்கள் மீதான கடன் சுமையை மட்டுப்படுத்தப்பட்ட முறையில் தளர்த்துதல் மற்றும் நுகர்வோர் செலவினங்களை உயர்த்துவதற்கான ஒரு சில திட்டங்கள் உட்பட சில நடவடிக்கைகள் தொடங்கப்பட்டுள்ளன.

கடந்த ஆண்டு அறிமுகப்படுத்தப்பட்ட ஒரு மானியத் திட்டத்தை விரிவுபடுத்துவதாக அரசாங்கம் இந்த வாரம் அறிவித்தது. பழைய சாதனங்களான ஏர் கண்டிஷனர்கள் மற்றும் சலவை இயந்திரங்கள் போன்றவற்றை புதியவைகளுக்காக விற்பனை செய்த வாடிக்கையாளர்களுக்குப் ஊக்கப்பணம் வழங்கியது. மைக்ரோவேவ், ரைஸ் குக்கர்கள் மற்றும் பாத்திரங்கழுவி மற்றும் 6000 ரென்மின்பிக்கும் குறைவான விலையுள்ள ஸ்மார்ட்போன்கள் மற்றும் டேப்லெட்டுகள் போன்ற பொருட்களுக்கு மானியத் திட்டம் விரிவுபடுத்தப்பட்டுள்ளது.

நிதி அமைச்சகத்தின் கூற்றுப்படி, இந்த திட்டத்திற்கு 2025 இல் 81 பில்லியன் ரென்மின்பி ($US 11 பில்லியன்) செலவாகும்.

இந்தத் திட்டம் ஏற்கனவே நுகர்வை அதிகரிப்பதில் சில தாக்கத்தை ஏற்படுத்தியுள்ளது. கடந்த ஆண்டு 36 மில்லியன் மக்கள் புதிய உபகரணங்களை வாங்க இந்தத் திட்டத்தைப் பயன்படுத்தியதாக வர்த்தக அமைச்சகம் தெரிவித்துள்ளது. ஆனால் இது 1.4 பில்லியன் மக்கள் தொகை கொண்ட நாட்டில் சந்தையில் ஒரு சிறிய பகுதியாகும். இதன் விளைவுகள் குறுகிய காலத்திற்குத்தான்.

பைனான்சியல் டைம்ஸ் (FT) குறிப்பிட்டதைப் போல, “நவம்பரில் ஒட்டுமொத்த விற்பனை வெறும் 3 சதவீதம் மட்டுமே உயர்ந்தது, இது எதிர்பார்த்த அளவுக்கு நடக்கவில்லை மற்றும் நுகர்வு வளர்ச்சியின் வேகம் குறித்த கவலைகளை மீண்டும் எழுப்பியது, அதேவேளையில் மனைக்கட்டுமான துறை தரவுகள் 2015 க்குப் பின்னர் இருந்து புதிய மனை விலைகளில் ஆண்டுக்கு ஆண்டு மிகப்பெரிய வீழ்ச்சியையும் சொத்து முதலீட்டில் ஆழமடைந்து வரும் வீழ்ச்சியையும் எடுத்துக்காட்டியுள்ளன.”

நிதி மூலதனம் உள்நாட்டு பொருளாதாரத்தை இலக்காகக் கொண்ட “பிக் பாஸூகா” (big bazooka) என்று அழைக்கப்படுவதை எதிர்பார்க்கிறது. “2025இல் கவனிக்க வேண்டிய முக்கிய விடயங்களின் அடிப்படையில்... முதலீட்டாளர்கள் நுகர்வு குறித்து அதிகம் பார்க்க வேண்டும் என்று நாங்கள் நினைக்கிறோம்” என்று பாங்க் ஆஃப் அமெரிக்காவின் தலைமை சீன பங்கு மூலோபாயவாதி வின்னி வூ (Winnie Wu) பைனான்சியல் டைம்ஸ் (FT) பத்திரிகைக்கு தெரிவித்தார்.

ஆனால் சில விளிம்புநிலை நடவடிக்கைகளை அறிமுகப்படுத்த அது தயாராக இருந்தாலும், ஜனாதிபதி ஜி ஜின்ஜிங் சமீபத்திய உரைகள் மற்றும் கருத்துக்களில் நுகர்வை உயர்த்த வேண்டியதன் அவசியத்தை சுட்டிக்காட்டியிருந்தாலும், அரசாங்கம் கடந்த காலத்தில் செய்ததைப் போன்ற பெரிய அளவிலான தூண்டுதல் நடவடிக்கைகளை அறிமுகப்படுத்தத் தயாராக இல்லை, இது கடன் பிரச்சினைகளை அதிகரிக்கும் என்று அஞ்சுகிறது.

மேலும், பைடென் நிர்வாகத்தின் இறுதி நாட்களில் ட்ரம்ப் வரிவிதிப்பு அச்சுறுத்தல்கள் மற்றும் அமெரிக்காவிடமிருந்து பொருளாதார போர் நடவடிக்கைகள் தீவிரப்படுத்தப்படுவதால் இது மிகவும் நிச்சயமற்ற பொருளாதார சூழலில் செயல்பட்டு வருகிறது.

இந்த வாரம் வாஷிங்டனிலிருந்து வந்த சமீபத்திய முடிவில், பென்டகன் சீன இராணுவத்துடன் தொடர்புகள் வைத்திருப்பதாக கருதப்படும் பட்டியலில் மேலும் பல நிறுவனங்களை சேர்த்துள்ளது. சமூக ஊடகங்கள் மற்றும் கேமிங் நிறுவனமான டென்சென்ட் (Tencent), உலகின் மிகப்பெரிய மின்சார வாகன பேட்டரிகளை தயாரிக்கும் சிஏடிஎல் (CATL) மற்றும் சீனாவின் மிகப்பெரிய கப்பல் நிறுவனமும் உலகின் மிகப்பெரிய நிறுவனங்களில் ஒன்றான காஸ்கோவும் (COSCO) இதில் அடங்கும். இப்போது பட்டியலில் 134 நிறுவனங்கள் சேர்க்கப்பட்டுள்ளன.

பென்டகன் தயாரித்துள்ள பட்டியல் அதனுடன் எந்தப் பொருளாதாரத் தடைகளையும் கொண்டு வரவில்லை, ஆனால் பெயரிடப்பட்ட நிறுவனங்கள் மேலதிக நடவடிக்கைக்கு இலக்கு வைக்கப்படுகின்றன என்பதற்கான உறுதியான அடையாளமாக இருக்கிறது.

இந்த மூன்று நிறுவனங்களும் இராணுவத்துடனான தொடர்புகள் இருப்பதான கருத்துக்களை மறுத்துள்ளன, டென்சென்ட் அது “தெளிவான ஒரு தவறு” என்றும், “எந்தவொரு தவறான புரிதலையும் நிவர்த்தி செய்ய” அது பாதுகாப்புத் துறையுடன் இணைந்து செயல்படும் என்றும் வலியுறுத்தியது. இராணுவம் தொடர்பான வணிகத்தில் ஒருபோதும் ஈடுபடவில்லை என்று CATL கூறியது. காஸ்கோ தனது நிறுவனங்கள் எதுவும் இராணுவத்துடன் தொடர்பு கொள்ளவில்லை என்றும், அமெரிக்க அதிகாரிகளுடன் “இந்த விடயத்தை தெளிவுபடுத்த” முயலும் என்றும் கூறியது.

ஆனால் பென்டகனின் நடவடிக்கைகள் தவறுகளோ அல்லது தவறான புரிதலின் விளைவோ அல்ல. இராணுவத்துடன் நேரடித் தொடர்பு இருந்தாலும் இல்லாவிட்டாலும், சீனாவின் பொருளாதார மற்றும் தொழில்நுட்ப முன்னேற்றம் அமெரிக்காவிற்கு ஒரு அச்சுறுத்தலாகும் என்ற நிலைப்பாட்டை உரத்த குரலில் முன்வைப்பதில் அமெரிக்க இராணுவ எந்திரமும் ஒன்றாகும்.

பட்டியலில் இருக்கும் CATL பொருளாதார போர் தீவிரமடைகையில் எழும் சில முரண்பாடுகளைச் சுட்டிக்காட்டுகிறது. அதன் விரிவாக்கப்பட்ட விற்பனையின் விளைவாக – CATL, டெஸ்லாவுக்கு ஒரு விநியோகிப்பாளராக (supplier) - நிறுவனம் ஹாங்காங்கில் இரண்டாம் நிலை பங்குச் சந்தை பட்டியலுக்கான திட்டங்களை வகுத்துக் கொண்டிருந்தது, முதல் பொதுப்பங்கு வெளியீடு மூலம் (IPO) அதன் சர்வதேச செயல்பாடுகளை விரிவுபடுத்தும்போது வெளிநாட்டு நிதிகளைப் பெறுவதை நோக்கமாகக் கொண்டுள்ளது.

அமெரிக்க நிறுவனங்களான கோல்ட்மேன் சாச்ஸ், பாங்க் ஆப் அமெரிக்கா, ஜேபி மோர்கன் மற்றும் மோர்கன் ஸ்டான்லி ஆகியவை முதல் பொதுப்பங்கு வெளியீட்டை (IPO) ஆதரிப்பதில் ஆர்வம் காட்டியுள்ளதாக அறிவித்திருக்கின்றன. கடந்த காலத்தில் அமெரிக்க வங்கிகள் இத்தகைய பேரங்கள் மூலம் கணிசமான இலாபங்களை ஈட்டின. ஆனால் பென்டகன் பட்டியலிடப்பட்ட பின்னர் அவர்கள் அவ்வாறு செய்தால், சீன இராணுவத்துடன் தொடர்புகளைக் கொண்ட ஒரு நிறுவனத்திற்கு பங்குகளுக்கு உத்தரவாதம் அளித்ததாக அவர்கள் மீது குற்றம் சாட்டப்படலாம், அது அமெரிக்க தேசிய பாதுகாப்பிற்கு அச்சுறுத்தல் என்று கூறப்படுகிறது.

2021 ஆம் ஆண்டில், சீன நுகர்வோர் மின்னணு நிறுவனமான Xiaomi தன்னை பென்டகன் பட்டியலிலிருந்து நீக்க நீதிமன்ற நடவடிக்கையை மேற்கொண்டது. 5 ஜி மற்றும் செயற்கை நுண்ணறிவில் அதன் முதலீடு, அதைச் சேர்ப்பதற்கான காரணம், மற்ற எல்லா நிறுவனங்களும் என்ன செய்கின்றன என்று அது வெற்றிகரமாக வாதிட்டது.

சமீபத்திய பெயரிடப்பட்ட நிறுவனங்கள் அதே பாதையில் செல்ல முயற்சிக்கும் என்பதில் சந்தேகமில்லை. ஆனால் நான்காண்டுகளுக்குப் பின்னர், சீனாவுக்கு எதிரான பொருளாதாரப் போர் பண்புரீதியில் தீவிரப்படுத்தப்பட்டுள்ளதுடன், ட்ரம்பின் கீழ் இன்னும் தீவிரமடைய உள்ளது.