மொழிபெயர்ப்பின் மூலக் கட்டுரையை இங்கே காணலாம். 

கடந்த திங்களன்று, அமெரிக்காவில் சமூக சமத்துவமின்மையின் வளர்ச்சி குறித்து “சமத்துவமற்றது: ஒரு புதிய அமெரிக்க தன்னலக்குழுவின் எழுச்சி” என்ற தலைப்பில் ஒரு அறிக்கையை, ஒக்ஸ்பாம் தொண்டு நிறுவனம், வெளியிட்டது.

“கடந்த ஆண்டானது, செறிவான செல்வத்தாலும், அதிகாரத்தாலும் அழிக்க முடியாத அளவுக்கு வடிவமைக்கப்பட்டுள்ளது” என்று அந்த அறிக்கை குறிப்பிடுகிறது. மேலும், கடந்த 12 மாதங்களில் மட்டும், அமெரிக்காவின் 10 பணக்கார பில்லியனர்கள் சுமார் 700 பில்லியன் டாலர்கள் அளவுக்கு உயர்ந்து, பெரும் செல்வந்தர்களாகிவிட்டதாக” தரவுகளை அது மேற்கோள் காட்டுகிறது. இந்தக் காலகட்டத்தில், அவர்களின் செல்வம் 40 சதவீதம் அதிகரித்து, 1.79 டிரில்லியன் டாலரிலிருந்து 2.5 டிரில்லியன் டாலராக உயர்ந்துள்ளது.

ட்ரம்ப் நிர்வாகம் பத்து மில்லியன் கணக்கான அமெரிக்க குடும்பங்களுக்கான உணவு முத்திரை சலுகைகளை வெட்டிய ஒரு நாள் கழித்து ஒக்ஸ்பாம் இந்த அறிக்கையை வெளியிட்டது. அமெரிக்க ஜனாதிபதி ட்ரம்ப் வெள்ளை மாளிகையில் ஒரு பெரிய களியாட்ட அரங்கை கட்டியெழுப்ப தொடங்கியபோது இது நடந்துள்ளது. மேலும், அவரது பில்லியனர் நண்பர்கள் வார இறுதியில், அவரது மார்-ஏ-லாகோ உல்லாச விடுதியில் தங்களுக்கான ஒரு “கிரேட் கேட்ஸ்பி” என்ற கருப்பொருள் விருந்தை நடத்தினர்.

வெள்ளை மாளிகையில் அதிகாரத்தை வைத்திருக்கும் ஒரு ஒட்டுண்ணி தன்னலக்குழுவின் அமெரிக்காவின் மேலாதிக்கம், அனைவரும் காணக்கூடிய வகையில் காட்சிப்படுத்தப்பட்டுள்ளது.

ஆனால் ட்ரம்பின் கீழ் மேற்கொள்ளப்பட்டு வரும் செல்வ வளத்தின் மேல்நோக்கிய மறுபகிர்வு எவ்வளவு வன்முறையாக இருந்தாலும், அது இரு கட்சிகளாலும் முன்னெடுக்கப்பட்ட பல தசாப்த கால சிக்கன நடவடிக்கைகள் மற்றும் பெருநிறுவன-சார்பு கொள்கைகளின் விளைபொருளாகும் என்பதை ஒக்ஸ்பாம் அறிக்கை தெளிவுபடுத்துகிறது. அதன் அறிக்கை அறிவிப்பது போல், “கதை 2025 இல் தொடங்கவில்லை.”

அமெரிக்காவின் பத்து பணக்காரர்களின் பட்டியலுக்குத் திரும்புகையில், ஒக்ஸ்பாமின் அறிக்கை, “2020 முதல், பணவீக்கத்திற்கு ஏற்ப அவர்களின் சொத்துக்கள் 526 சதவீதம் அதிகரித்துள்ளன” என்று குறிப்பிட்டுள்ளது. வேறு வார்த்தைகளில் கூறுவதானால், மார்ச் 2020 முதல் இன்று வரை, இந்த பத்து தனிநபர்களின் சொத்துக்கள் கூட்டாக ஆறு மடங்குகள் அதிகரித்துள்ளது.

உதாரணமாக, எலோன் மஸ்க்கை எடுத்துக் கொள்ளுங்கள், அவரது சொத்துக்கள் மார்ச் 2020 இல் 33 பில்லியன் டாலராக இருந்தன. ஆனால், பின்னர் பதினான்கு மடங்கு அதிகரித்து 469 பில்லியன் டாலரை எட்டியுள்ளன.

இந்த பட்டியலில் இரண்டாவது இடத்தில் உள்ள லாரி எலிசனின் சொத்து மதிப்பு, மார்ச் 2020 இல் 54 பில்லியன் டாலரிலிருந்து 323 பில்லியன் டாலராக, ஆறு மடங்கு அதிகரிப்பைக் கண்டது. பட்டியலில் மூன்றாவது இடத்தில் உள்ள ஜெஃப் பெசோஸின் சொத்து மதிப்பு, மார்ச் 2020 இல் 126 பில்லியன் டாலரிலிருந்து இன்று 265 பில்லியன் டாலராக அதிகரித்துள்ளது.

வோல் ஸ்ட்ரீட்டில் பங்கு மதிப்புகளின் இடைவிடாத ஊக வளர்ச்சியால் செல்வத்தின் அதிகரிப்பு உந்தப்படுகிறது. “2025 ஆம் ஆண்டளவில், ஃபெடரல் ரிசர்வ் வங்கி, 1989 இல் தரவுகளை வெளியிடத் தொடங்கியதிலிருந்து (12.6 சதவிகிதம்) மிகவும் செல்வந்தர்களாக 0.1 சதவீதம் பேர் வைத்திருக்கும் சொத்துக்களின் பங்கு இதுவரை பதிவு செய்யப்படாத மிக உயர்ந்த நிலையை எட்டியது. அதே போல், பங்குச் சந்தையில் அவர்களின் பங்கும் (24 சதவிகிதம்) இருக்கும்” என்று ஒக்ஸ்பாமின் அறிக்கை குறிப்பிட்டது.

இன்றைய 13.9 சதவீதத்துடன் ஒப்பிடும்போது, 1989 இல், உயர்மட்ட 0.1 சதவிகித குடும்பங்கள் 8.6 சதவீத செல்வத்தைக் கட்டுப்படுத்தின. இதற்கு நேர்மாறாக, அமெரிக்க சமூகத்தின் கீழ்மட்டத்திலுள்ள 50 சதவீதத்தினரால் கட்டுப்படுத்தப்படும் செல்வத்தின் பங்கு, 1989 இல் 3.5 சதவீதத்திலிருந்து இன்று 2.5 சதவீதமாகக் குறைந்துள்ளது

வேறு வார்த்தைகளில் கூறுவதானால், 100,000 க்கும் சற்று அதிகமான மக்களைக் கொண்ட அமெரிக்க குடும்பங்களில் உள்ள உயர்மட்ட 0.1 சதவிகிதத்தினர், சமூகத்தின் அடிமட்டத்தில் உள்ள 64 மில்லியன் குடும்பங்களை விட ஆறு மடங்கு அதிக செல்வத்தைக் கட்டுப்பாட்டில் வைத்துள்ளனர் என்பதாகும்.

உண்மையில், தோமஸ் பிக்கெட்டி மற்றும் இம்மானுவேல் சேஸ் ஆகியோரின் புள்ளி விவரங்களை மேற்கோள் காட்டி, ஒக்ஸ்பாம் வெளியிட்ட அறிக்கை, “அமெரிக்க வரலாற்றில் தீவிர சமத்துவமின்மையால் வகைப்படுத்தப்பட்ட கில்டட் யுகத்தை விட, 0.0001 சதவீத பணக்காரர்கள் செல்வத்தின் பெரும் பங்கைக் கட்டுப்படுத்துகின்றனர்” என்று குறிப்பிடுகிறது.

மேலும், அந்த அறிக்கை, “பணக்காரர்களில் 1 சதவீத பேர் பங்குச் சந்தையில் பாதியை (49.9 சதவீதம்) சொந்தமாகக் கொண்டுள்ளனர். அதே நேரத்தில், அமெரிக்க மக்கள்தொகையில் கீழ் மட்டத்திலுள்ள பாதிப் பேர், பங்குச் சந்தையில் 1.1 சதவீதத்தை மட்டுமே சொந்தமாகக் கொண்டுள்ளனர்” என்று கூறியது.

ட்ரம்ப் நிர்வாகம் சமூக சமத்துவமின்மையை பெருமளவில் விரிவுபடுத்தும் கொள்கைகளை செயல்படுத்தி வருவதாக அந்த அறிக்கை சரியாக எச்சரிக்கிறது. “ட்ரம்ப் நிர்வாகம், பெரும்பாலும் காங்கிரஸில் உள்ள குடியரசுக் கட்சியினரின் ஆதரவுடன், தொழிலாள வர்க்க குடும்பங்கள் மீது இடைவிடாத தாக்குதலை நடத்துவதற்கும், செல்வந்தர்கள் மற்றும் அவர்களுடன் நன்கு தொடர்புடையவர்களை செல்வந்தர்களாக்க, பதவி அதிகாரத்தைப் பயன்படுத்தவும் வியக்கத்தக்க வேகத்துடனும் நோக்கத்துடனும் செயல்பட்டு வருகிறது” என்று ஒக்ஸ்பாம் அறிக்கை எச்சரிக்கிறது.

சமீபத்தில் நிறைவேற்றப்பட்ட ஒரு பெரிய அழகான மசோதா சட்டம் (OBBBA) 2027 ஆம் ஆண்டில் அதிக வருமானம் ஈட்டும் 0.1 சதவீத வரி மசோதாவை 311,000 டாலர்களுக்கு குறைக்கும் என்று ஒக்ஸ்பாம் குறிப்பிடுகிறது, அதே நேரத்தில் குறைந்த வருமானம் கொண்ட குடும்பங்கள் - ஆண்டுதோறும் 15,000 டாலர்களுக்கும் குறைவாக சம்பாதிப்பவர்கள் - வரி அதிகரிப்பை எதிர்கொள்ள நேரிடும்” என்று என்று ஒக்ஸ்பாம் குறிப்பிடுகிறது.

ஆனால், ஒக்ஸ்பாமின் இந்த அறிக்கை தெளிவாக சுட்டிக்காட்டுவது போல, ட்ரம்ப் நிர்வாகம் பல தசாப்தங்களாக கடைப்பிடித்துவரும் செயல்முறைகளை முன்னெப்போதும் இல்லாத வேகத்தில் துரிதப்படுத்தி வருகிறது. “கொள்கை வகுப்பாளர்கள் சமத்துவமின்மையைத் தேர்ந்தெடுத்துள்ளனர், மேலும் இந்தத் தேர்வுகள் இரு கட்சிகளின் ஆதரவால் பயனடைந்துள்ளன,” என்று இந்த ஆய்வின் ஆசிரியர் ரெபேக்கா ரிடெல் கார்டியனிடம் கூறினார். “கடந்த 40 ஆண்டுகளில் வரிக் குறைப்பு, சமூக பாதுகாப்பு வலையமைப்பு, தொழிலாளர் பிரச்சினைகள் மற்றும் அதற்கு அப்பால் உள்ள கொள்கை சீர்திருத்தங்கள் உண்மையில் இரு கட்சிகளின் ஆதரவையும் கொண்டிருந்தன” என்று அவர் மேலும் தெரிவித்தார்.

இந்த மதிப்பீடு உண்மைதான். ஆனால் இங்குதான் அறிக்கை முடிச்சுகளில் சிக்கிக் கொள்கிறது. சமூக சமத்துவமின்மையின் எழுச்சி இரு அரசியல் கட்சிகளின் கீழும் பல தசாப்தங்களாக ஏற்பட்டுள்ளது என்பதை ஆய்வின் ஆசிரியர் சரியாக சுட்டிக்காட்டுகிறார். இருப்பினும், அறிக்கை பின்வரும் கூற்றையும் முன்வைக்கிறது:

பைடென் நிர்வாகத்தின் போது செய்யப்பட்ட சாதனைகள், —வறுமையைக் குறைத்தல், குறைந்த ஊதியம் பெறும் தொழிலாளர்களுக்கு ஊதியம் உயர்வு, மற்றும் குடும்பங்களின் பாக்கெட்டுகளுக்கு பணத்தை திருப்பிக் கொடுக்கும் வலுவான நம்பிக்கையற்ற நடவடிக்கைகள் போன்றவை—மக்களின் வாழ்க்கையை மேம்படுத்தும் கொள்கை மாற்றத்தை உறுதி செய்வதற்கான உண்மையான திறனை நிரூபித்தன.

இந்தக் கூற்றுக்கள் அறிக்கையின் சொந்த கண்டுபிடிப்புகளால் முற்றிலும் முரண்படுகின்றன. பைடென் நிர்வாகத்தின் கீழ், நிதிய தன்னலக்குழுவால் கட்டுப்படுத்தப்படும் செல்வத்தின் பங்கு ட்ரம்ப் நிர்வாகத்தின் கீழ் எட்டப்பட்டதை விட அதிகமாக அதிகரித்தது. அமெரிக்காவின் 10 பணக்காரர்களின் ஒட்டுமொத்த செல்வவளம், 2021 ஜனவரியில் 976 பில்லியன் டாலரிலிருந்து 2025 ஜனவரியில் 1,991 பில்லியன் டாலராக இரட்டிப்பாகியுள்ளது. இந்த நேரத்தில், தேசிய வருமானத்தில் தொழிலாளர்களின் பங்கு முன்னெப்போதும் இல்லாத அளவிற்கு வீழ்ச்சியடைந்தது.

பைடெனின் கீழ், அமெரிக்க குழந்தைகளுக்கான உணவுப் பாதுகாப்பின்மை விகிதம் 13 சதவீதத்தில் இருந்து 19 சதவீதமாக அதிகரித்தது. அவரது நிர்வாகத்தின் கடைசி ஆண்டில், அமெரிக்க வீட்டுவசதி மற்றும் நகர்ப்புற மேம்பாட்டுத் துறை அதன் வருடாந்திர அறிக்கையில், “2024 இல் ஒரே இரவில் வீடற்ற நிலையை அனுபவிக்கும் மக்களின் எண்ணிக்கை, இதுவரை பதிவு செய்யப்பட்ட மிக உயர்ந்த எண்ணிக்கையாகும்” என்று குறிப்பிட்டுள்ளது.

வேறு வார்த்தைகளில் கூறுவதானால், பைடென் நிர்வாகம், தொழிலாள வர்க்கத்திற்கு ஒரு பேரழிவாகவும், நிதியியல் தன்னலக்குழு தட்டுக்களுக்கு ஒரு வரப் பிரசாதமாகவும் இருந்துள்ளது.

இந்த அறிக்கையின் முன்னுரையை ஜனநாயகக் கட்சி செனட்டர் எலிசபெத் வாரன் எழுதியுள்ளார். “மிக உயர்ந்த பதவியில் இருப்பவர்களுக்கு சிறப்பாகச் செயல்படும், மற்ற அனைவரையும் அவர்களின் நகங்களால் தொங்கவிடும் ஒரு பொருளாதாரம் ... வேண்டுமென்றே கொள்கைத் தேர்வுகள் மூலம் ஏற்பட்டது “ என்று அவர் அறிவிக்கிறார்.

ஆயினும்கூட, ஒக்ஸ்பாம் அறிக்கையில் ஆவணப்படுத்தப்பட்டுள்ள சமூக சமத்துவமின்மையின் அதிகரிப்பின் பெரும் பங்கு, அவர் ஆதரித்த ஒரு நிர்வாகத்தின் கீழ், விதிவிலக்கு இல்லாமல், மீண்டும் மீண்டும் பாதுகாத்த கொள்கைகளின் கீழ் எவ்வாறு நடந்தது என்பதை அவர் விளக்கவில்லை.

ஒக்ஸ்பாம் அறிக்கையின் முக்கிய உரையில் ஒரு வார்த்தை மட்டுமே சொல்லப்படாமல் விடப்பட்டுள்ளது: அது முதலாளித்துவமாகும். சமூக சமத்துவமின்மையின் வளர்ச்சி என்பது வெறும் கொள்கைத் தேர்வு என்றும், தற்போதைய சமூக கட்டமைப்பிற்குள் மற்றொரு தேர்வை எளிதாக ஏற்றுக்கொள்ள முடியும் என்றும் வாதிடுவதே அதன் அடிப்படை கட்டமைப்பாகும்.

எவ்வாறிருப்பினும், உண்மையில், ஜனநாயகக் கட்சியினர் மற்றும் குடியரசுக் கட்சியினரின் கீழ், சமூக சமத்துவமின்மையின் தொடர்ச்சியான வளர்ச்சி, முதலாளித்துவ அமைப்புமுறையின் ஒரு அடிப்படை அம்சமாகும். 150 ஆண்டுகளுக்கு முன்னர் கார்ல் மார்க்ஸ், “ஒரு துருவத்தில் செல்வக் குவிப்பு... அதே நேரத்தில் எதிர் துருவத்தில், அதாவது மூலதன வடிவில், அதன் சொந்த உற்பத்தியை உற்பத்தி செய்யும் வர்க்கத்தின் பக்கத்தில், துன்பம், உழைப்பின் வேதனை, அடிமைத்தனம், அறியாமை, மிருகத்தனம் மற்றும் மனச் சீரழிவு ஆகியவற்றின் குவிப்பு ஆகும்” என்று விளக்கினார்.

ட்ரம்ப் நிர்வாகத்தின் மிக உயர்ந்த, மற்றும் மிகவும் கோரமான வெளிப்பாடாக, 150 ஆண்டுகளுக்கு முன்னர் கார்ல் மார்க்ஸால் விவரிக்கப்பட்ட முதலாளித்துவ அமைப்புமுறையின் இன்றியமையாத பண்புகளின் ஒரு நீட்சியை பிரதிநிதித்துவம் செய்கிறது. இது பில்லியனர்கள் மற்றும் அவர்களின் நிறுவனங்களின் சார்பாக, நேரடியாக ஆட்சி செய்யும் முதலாளித்துவ தன்னலக்குழுவின், தன்னலக்குழுவிற்கான அரசாங்கமாகும்.

இதுதான், ஜனநாயக உரிமைகளை அழிப்பதில் உள்ள வர்க்க உள்ளடக்கமாகும். வன்முறை, அடக்குமுறை மற்றும் ஜனநாயக உரிமைகளை அழிப்பதன் மூலம் மட்டுமே தனது செல்வத்தையும் அதிகாரத்தையும் தக்க வைத்துக் கொள்ளக்கூடிய ஒரு ஆளும் வர்க்கத்தின் தேவைகளிலிருந்து ட்ரம்பின் அதிகரித்து வரும் சர்வாதிகாரத்திற்கான சதித்திட்டம் உருவாகிறது. இதற்கு, ஜனநாயகக் கட்சியின் உடந்தை மற்றும் கோழைத்தனம், அதே முதலாளித்துவ தன்னலக்குழுவின் மற்றொரு பிரிவை அது பிரதிநிதித்துவப்படுத்துகிறது என்பதன் மூலம் விளக்கப்படுகிறது.

ஆனால், அமெரிக்காவில் சமூக மனநிலை மாறி வருகிறது. கடந்த மாதம், ஜனநாயக உரிமைகள் மற்றும் சிக்கன நடவடிக்கைகள் மீதான ட்ரம்ப் நிர்வாகத்தின் தாக்குதல், “மன்னர்கள் வேண்டாம்” ஆர்ப்பாட்டங்களில், மில்லியன் கணக்கான மக்கள் போராடுவதுக்கு வழிவகுத்தது. இது, அமெரிக்க வரலாற்றில் மிகப்பெரிய ஒன்றாகும். சமீபத்திய ஆக்சியோஸ் கருத்துக்கணிப்பு ஒன்று, அமெரிக்காவில் 67 சதவீத இளைஞர்கள் இப்போது “சோசலிசம்” என்ற வார்த்தையை சாதகமாகவோ அல்லது நடுநிலையாகவோ பார்க்கிறார்கள் என்று கண்டறிந்துள்ளது. முதலாளித்துவத்திற்கு வெறும் 40 சதவீதத்துடன் ஒப்பிடும்போது இது அதிகமாகும்.

மக்கள்தொகையின் பரந்த பிரிவுகளிடையே, குறிப்பாக தொழிலாளர்கள் மற்றும் இளைஞர்களிடையே, சமூக சமத்துவமின்மை மற்றும் நிதிய தன்னலக்குழுவின் சர்வாதிகாரத்திற்கு எதிர்ப்பு அதிகரித்து வருகிறது.

சோசலிச சமத்துவக் கட்சி, நிதிய உயரடுக்கின் அருவருப்பான செல்வங்கள் பறிமுதல் செய்யப்பட வேண்டும் என்று வலியுறுத்துகிறது. தன்னலக்குழுக்களின் செல்வத்தை, பொருளாதார மற்றும் அரசியல் வாழ்க்கையின் ஒவ்வொரு அம்சத்திலும் ஆதிக்கம் செலுத்தும் மாபெரும் நிறுவனங்கள், வங்கிகள் மற்றும் முதலீட்டு நிதிகள் மீதான அவர்களின் கட்டுப்பாட்டிலிருந்து பிரிக்க முடியாதது. இந்த நிறுவனங்கள் பொதுச் சேவைகளின் பயன்பாட்டிற்கு மாற்றப்பட வேண்டும். அவை தொழிலாள வர்க்கத்தால் ஜனநாயக முறையில் கட்டுப்படுத்தப்பட வேண்டும் மற்றும் தனியார் இலாபத்திற்காக அன்றி மனித தேவைகளை பூர்த்தி செய்யும் வகையில் மறுஒழுங்கமைக்கப்பட வேண்டும்.

வோல் ஸ்ட்ரீட்டின் எந்தக் கட்சிக்கும் முறையீடு செய்வதன் மூலம் இத்தகைய மாற்றத்தை அடைய முடியாது. சாமானிய தொழிலாளர் குழுக்களின் சர்வதேச தொழிலாளர் கூட்டணி (IWA-RFC) மூலமாக, சர்வதேச அளவில் ஐக்கியப்பட்டு, சாமானிய தொழிலாளர் குழுக்களில் ஒழுங்கமைக்கப்பட்டு, தொழிலாள வர்க்கத்தின் ஒரு பாரிய இயக்கத்தைக் கட்டியெழுப்புவது இதற்கு அவசியமாகும். சமத்துவமின்மை மற்றும் சர்வாதிகாரத்திற்கு எதிரான போராட்டம் என்பது, அதன் சாராம்சத்தில், முதலாளித்துவத்திற்கு எதிரான ஒரு போராட்டமாகும். சுரண்டல், வறுமை மற்றும் போருக்கு முடிவுகட்டுவதற்கு, தொழிலாள வர்க்கம் அதிகாரத்தைக் கைப்பற்றி, சோசலிச அடித்தளத்தின் மீது பொருளாதார வாழ்வை மீளக் கட்டியெழுப்ப வேண்டும்.