இந்த மொழிபெயர்ப்பின் மூலக் கட்டுரையை இங்கு காணலாம்.

கடந்த வியாழக்கிழமை, இலங்கையில் சமூக சமத்துவத்திற்கான அனைத்துலக இளைஞர் மற்றும் மாணவர் (IYSSE) அமைப்பு, 'சர்வதேச நாணய நிதிய சிக்கன நடவடிக்கைகளுக்கு எதிராக போராடுவது எப்படி?” என்ற தலைப்பில் கண்டியில் ஒரு கூட்டத்தை நடத்தின.

ஜனவரி 3 அன்று இதே தலைப்பில் பேராதனை பல்கலைக்கழகத்தில் நடத்த திட்டமிடப்பட்டிருந்த ஐ.வை.எஸ்.எஸ்.இ. கூட்டத்தை கடைசி நேரத்தில் பதில் துணைவேந்தர் தடை செய்ததை அடுத்தே இந்த நிகழ்வு ஏற்பாடு செய்யப்பட்டது. பல்கலைக்கழகத்தின் அரசியல் விஞ்ஞான துறையில் ஜனவரி 3 அன்று நடத்த திட்டமிடப்பட்டிருந்த கூட்டத்துக்கு அரசியல் விஞ்ஞான மாணவர் சங்கம் (அ.வி.மா.ச.) அனுசரணை வழங்கியிருந்தது.

இந்த ஜனநாயக விரோத தாக்குதலுக்கு எதிராக ஐ.வை.எஸ்.எஸ்.இ. உடனடியாக ஒரு பிரச்சாரத்தைத் தொடங்கியதுடன், உலக சோசலிச வலைத் தளத்தில் ஒரு அறிக்கையை வெளியிட்டதோடு அருகிலுள்ள கண்டியில் இதே கூட்டத்தை நடத்த மறு ஏற்பாடு செய்தது. சோசலிச சமத்துவக் கட்சி (சோ.ச.க.) மற்றும் ஐ.வை.எஸ்.எஸ்.இ. ஆதரவாளர்கள் அறிக்கையின் சிங்கள மற்றும் தமிழ் பதிப்புகளின் நூற்றுக்கணக்கான பிரதிகளை பல்கலைக்கழகத்திலும் கண்டியிலும் உள்ள தொழிலாளர்கள் மற்றும் மாணவர்கள் மத்தியில் விநியோகித்தனர்.

பல்கலைக்கழகத்தில் விதிக்கப்பட்ட தடை இலங்கை முழுவதும் சர்வதேச அளவிலும் மாணவர்கள், தொழிலாளர்கள், கல்வியாளர்கள் மற்றும் ஏனையோரிடமிருந்து பரவலான எதிர்ப்பைத் தூண்டியதுடன், இது வியாழக்கிழமை கூட்டத்தில் ஐம்பதுக்கும் மேற்பட்டோர் கலந்து கொண்டதில் பிரதிபலித்தது.

வியாழக்கிழமை கூட்டத்திற்கு சோ.ச.க. அரசியல் குழு உறுப்பினரும் ஐ.வை.எஸ்.எஸ்.இ. பிரதிநிதியுமான சகுந்த ஹிரிமுத்துகொட தலைமை தாங்கியதோடு, பிரதான அறிக்கையை சோ.ச.க. துணைச் செயலாளர் சமன் குணதாச வழங்கினார். அதைத் தொடர்ந்து கேள்வி பதில் அமர்வு நடைபெற்றது.

பல்கலைக்கழக துணைவேந்தர் கூட்டத் தடை செய்தமை, மக்கள் விடுதலை முன்னணி (ஜே.வி.பி.) / தேசிய மக்கள் சக்தி (தே.ம.ச.) அரசாங்கத்தின் சர்வதேச நாணய சார்பு-சார்பு திட்ட நிரலுக்கு இணங்கவே மேற்கொள்ளப்பட்டது என்பதை விளக்கி ஹிரிமுதுகொட கூட்டத்தைத் ஆரம்பித்து வைத்தார்.

ஐ.வை.எஸ்.எஸ்.இ., 'அரசாங்கக் கொள்கைகளை சவால் செய்வதாகத் தோன்றாதபடி அதன் கருப்பொருளை மாற்ற வேண்டும்' என்று துணைவேந்தர் உத்தரவிட்டதுடன் அதன் செய்தி தெளிவானது: 'கூட்டங்கள் அரசாங்கத்தை சவால் செய்யாவிட்டால் மட்டுமே நீங்கள் கூட்டங்களை நடத்தலாம்!'

இந்த உத்தரவு 'ஜே.வி.பி./தே.ம.ச. ஆட்சிக்கு ஐ.வை.எஸ்.எஸ்.இ.யை முழுமையாக அடிபணியச் செய்வதற்கான ஒரு பலவந்த முயற்சி. அரசாங்கம் தனது சொந்தக் கொள்கைகளை சர்வதேச நாணய நிதியக் கொள்கைகளுடன் சமன்படுத்துவதுடன் எந்தவொரு சவாலையும் அடக்குவதில் உறுதியாக உள்ளது என்பதை இது உறுதிப்படுத்துகிறது,' என்று ஹிரிமுதுகொட கூறினார்.

சோ.ச.க. கூட்டத்தில் உரையாற்றிய துணைச் செயலாளர் குணதாச, முன்னாள் ரணில் விக்கிரமசிங்க அரசாங்கத்தால் தொடங்கப்பட்ட சர்வதேச நாணய நிதியத்தின் கொடூரமான சிக்கன நடவடிக்கைகளை ஜே.வி.பி./தே.ம.ச. அரசாங்கம் முன்னெடுத்துச் செல்வதை, அனைத்து முதலாளித்துவக் கட்சிகளும் ஆதரிக்கின்றன, என்று விளக்கினார்.

'முன்னிலை சோசலிசக் கட்சி போன்ற போலி இடதுசாரிகளுக்கு இந்த சமூகத் தாக்குதல்கள் சம்பந்தமாக எந்த அடிப்படை வேறுபாடுகளும் இல்லை' என்று குணதாச கூறினார். முன்னிலை சோசலிசக் கட்சி 'சர்வதேச கடன் வழங்குநர்களுடன் தனித்தனி ஒப்பந்தங்களைப் பற்றி பேச்சுவார்த்தை நடத்த அரசாங்கத்திற்கு 'அறிவுறுத்துகிறது',' என்று அவர் விளக்கினார்.

2022 ஏப்ரல்-ஜூலை மாதங்களில் அப்போதைய ஜனாதிபதி கோட்டாபய இராஜபக்ஷவின் அரசாங்கத்திற்கு எதிரான வெகுஜன எழுச்சியின் போது, தொழிற்சங்கங்களும் முன்னிலை சோசலிசக் கட்சியும் ஏனைய போலி இடதுசாரிகளும் அதைக் காட்டிக் கொடுத்ததைத் தொடர்ந்து, விக்ரமசிங்க நிர்வாகம் எவ்வாறு ஆட்சிக்கு வந்தது என்பதை குணதாச மீளாய்வு செய்தார்.

இந்த அமைப்புகள், 'ஒரு இடைக்கால அரசாங்கத்திற்காக' ஜே.வி.பி./தே.ம.ச.யும் ஐக்கிய மக்கள் சக்தியும் விடுத்த அழைப்புகளை முழுமையாக ஆதரித்ததன் மூலம், விக்ரமசிங்க ஆட்சிக்கு வருவதற்கான வழியைத் திறந்துவிட்டதாக அவர் கூறினார்.

இந்த சக்திகள், குறித்த அரசாங்க-விரோத வெகுஜன எழுச்சியில் 'எந்த அரசியலையும்' அனுமதிக்கக்கூடாது என்றும் வலியுறுத்தின. இது 'இன்று நாம் கலந்துரையாடும் தொழிலாள வர்க்க வேலைத்திட்டம் பற்றிய எந்தவொரு கலந்துரையாடலையும் தடுப்பதற்காக' வடிவமைக்கப்பட்டது என்று அவர் மேலும் விளக்கினார்.

இரண்டாம் உலகப் போரின் பின்னர், பொருளாதார ரீதியாக பாதிக்கப்படக்கூடிய நாடுகளை 'மீட்பதற்கும்', அவை பூகோள முதலாளித்துவ முறைமையை சீர்குலைப்பதைத் தடுப்பதற்குமே சர்வதேச நாணய நிதியமும் உலக வங்கியும் நிறுவப்பட்டதாக குணதாச பார்வையாளர்களிடம் கூறினார். சர்வதேச நாணய நிதியமானது மில்லியன் கணக்கான உழைக்கும் மக்களின் வாழ்க்கையை இரக்கமின்றி நாசமாக்குவதன் மூலம், பெருவணிக மற்றும் சர்வதேச நிதி மூலதனத்தின் அதி உச்ச இலாபத்தை எவ்வாறு 'மீட்கிறது' என்பதையும் பின்னர் அவர் ஆராய்ந்தார்.

இது இப்போது, புதிய வரிகளை விதித்து, தொழிலாளர்கள் மீது ஏற்கனவே உள்ள வரிகளை உயர்த்தி, அதே நேரத்தில் பெரும் வணிகங்களுக்கான வரிகளைக் குறைப்பதன் மூலம் இலங்கையில் நிகழ்ந்து வருவதாக அவர் கூறினார்.

இதன் அர்த்தம், 'சுகாதாரம் மற்றும் கல்வி உட்பட சமூகத் தேவைகளுக்கான அரச செலவினம் அடிமட்டம் வரை வெட்டப்படுவதோடு' அதனுடன் சேர்த்து 400க்கும் மேற்பட்ட அரசுக்குச் சொந்தமான நிறுவனங்களை தனியார்மயமாக்குவதன் அல்லது வணிகமயமாக்கவதன் மூலம் அரச துறையில் இலட்சக்கணக்கான தொழில்கள் அழிக்கப்படுகின்றன என்று அவர் கூறினார்.

பின்னர், அரசாங்கத்தின் சிக்கன நடவடிக்கைகளைத் தோற்கடிப்பதற்கான சோசலிச சமத்துவக் கட்சியின் வேலைத்திட்டத்தையும், உழைக்கும் மக்கள் ஏற்றுக்கொள்ள வேண்டிய சோசலிச முன்னோக்கையும் குணதாச விவரித்தார். உற்பத்தியானது உழைக்கும் மக்களின் தேவைகளை அடிப்படையாகக் கொண்டிருக்க வேண்டுமே அன்றி, அதி உச்ச இலாபத்திற்கான உந்துதலை அடிப்படையாகக் கொண்டிருக்கக் கூடாது, என்று அவர் கூறினார்.

'பெரிய வணிகங்கள், வங்கிகள் மற்றும் பொருளாதாரத்தின் ஏனைய முக்கிய மையங்களை பறிமுதல் செய்து, இந்த உற்பத்தி சக்திகளை வழிநடத்தி இயக்கிவரும் தொழிலாளர்களின் ஜனநாயகக் கட்டுப்பாட்டின் கீழ் வைப்பதன் மூலம் உற்பத்தி மறுசீரமைக்கப்பட வேண்டும்,' என்று அவர் விளக்கினார்.

அரசாங்கம் சர்வதேச கடன் வழங்குநர்களுடன் கடனை திருப்பிச் செலுத்துவதில் சலுகைகளைப் பெறுவது பற்றி பேச்சுவார்த்தை நடத்த வேண்டும் என்ற போலி இடது முன்னிலை சோசலிசக் கட்சியின் வேண்டுகோள்கள், இலங்கை மக்களுக்கு எந்தப் பிரச்சினையையும் தீர்க்காது என்று குணதாச கூறினார். தொழிலாள வர்க்கம் அனைத்து வெளிநாட்டுக் கடன்களையும் திருப்பி செலுத்துவதை முழுமையாக நிராகரித்து, சர்வதேச நாணய நிதியத்தின் சிக்கனத் திட்டம் வேண்டாம் என மறுதளிக்க வேண்டும். இலங்கை தொழிலாள வர்க்கம், ஒரு சோசலிச முன்னோக்கிற்கான அதன் போராட்டத்தின் பாகமாக, இந்த நடவடிக்கைகளுக்காகப் போராட வேண்டியுள்ளது, என்று அவர் மேலும் கூறினார்.

'தொழிலாளர்கள் தங்கள் வேலைத் தளங்கள், பெருந்தோட்டங்கள், தொழிற்சாலைகள் மற்றும் சுற்றுப்புறங்களிலும், அனைத்து முதலாளித்துவக் கட்சிகள் மற்றும் தொழிற்சங்க அதிகாரத்துவங்களில் இருந்தும் சுயாதீனமாக, நடவடிக்கைக் குழுக்களை உருவாக்குவதன் மூலம், தங்கள் அமைப்புரீதியான வலிமையைக் கட்டியெழுப்ப வேண்டும். கிராமப்புற ஏழைகளும் தங்கள் பகுதிகளில் இதேபோன்ற குழுக்களை உருவாக்க வேண்டும்,' என்று அவர் கூறினார்.

இந்த முன்னோக்கு, ஜனநாயகத்துக்கும் சோசலிசத்துக்குமான தொழிலாளர்களதும் கிராமப்புற மக்களினதும் மாநாட்டிற்கான சோசலிச சமத்துவக் கட்சியின் அழைப்புடனும் சோசலிசக் கொள்கைகளுக்கு அர்ப்பணித்துக்கொண்ட தொழிலாளர் மற்றும் விவசாயிகளின் அரசாங்கத்திற்கான போராட்டத்துடனும் பிணைக்கப்பட்டதாகும், என்று அவர் தொடர்ந்தார்.

'இந்தப் போராட்டம், தெற்காசியாவிலும் சர்வதேச அளவிலும் சோசலிசத்திற்கான பரந்த போராட்டத்தின் ஒரு பகுதியாகும். இதில் இலங்கை தொழிலாள வர்க்கம் பிராந்தியத்திலும் உலக அளவிலும் உள்ள அதன் வர்க்க சகோதர சகோதரிகளுடன் ஒன்றிணையும்' என்று அவர் கூறியதுடன் கலந்து கொண்ட தொழிலாளர்கள், இளைஞர்கள் மற்றும் மாணவர்களுக்கு சோசலிச சமத்துவக் கட்சியிலும் ஐ.வை.எஸ்எஸ்.இ.யிலும் சேருமாறு அழைப்பு விடுத்து உரையை முடித்தார்.

கலந்துரையாடல் அமர்வில் இரண்டு கேள்விகள் எழுப்பப்பட்டன. ஒருவர் சர்வதேச நாணய நிதியத்தின் சிக்கன நடவடிக்கைகளை எதிர்க்கவும் பொருளாதார நெருக்கடியை சமாளிக்கவும் முடியுமா என்பதை அறிய விரும்பினார். இரண்டாவது கேள்வி, ஒரு பத்திரிகையாளரிடமிருந்து வந்தது. ஐ.வை.எஸ்.எஸ்.இ. கூட்டத்தின் மீதான தடை குறித்து பல்கலைக்கழகத்தைத் தொடர்பு கொண்டு கேட்டதாகவும், கூட்டத்திற்கு எந்த கட்டுப்பாடுகளும் விதிக்கப்படவில்லை என்று கூறப்பட்டதாகவும் அவர் தெரிவித்தார். அவர் பிரதமர் அலுவலகத்தைத் தொடர்பு கொண்டபோது, ​​கூட்டத்தைத் தடை செய்ய எந்த தலையீடும் செய்யப்படவில்லை என்று அவருக்குத் தெரிவிக்கப்பட்டதாக கூறினார்.

முதல் கேள்விக்கு பதிலளித்த குணதாச, ஜே.வி.பி./தே.ம.ச. அரசாங்கத்தின் சிக்கன நடவடிக்கைகளை எதிர்த்துப் போராடுவதற்கான ஒரே வழி ஒரு சோசலிச வேலைத்திட்டம் மட்டுமே என்று வலியுறுத்தினார். 'தொழிலாளர்கள் தொழிற்சாலைகள் மற்றும் பெரும் நிறுவனங்களின் கட்டுப்பாட்டை எடுத்துக்கொள்ள வேண்டும். அவை தேசியமயமாக்கப்பட்டு தொழிலாளர்களின் ஜனநாயகக் கட்டுப்பாட்டின் கீழ் கொண்டு வரப்பட வேண்டும்,' என்று அவர் கூறினார்.

பொருளாதார நெருக்கடி உலகளாவிய தன்மையைக் கொண்டது என்று விளக்கிய குணதாச, ஆளும் வர்க்கங்கள் தொழிலாள வர்க்கத்தைத் தாக்குவதன் மூலமும், தங்கள் போட்டியாளர்களுக்கு எதிராக பொருளாதார நடவடிக்கைகளைத் திணிப்பதன் மூலமும், முழு உலகத்தையும் மூன்றாம் உலகப் போருக்கும், பேரழிவு தரும் அணு ஆயுத மோதலுக்குள்ளும் இழுப்பதன் மூலமும் இந்த நெருக்கடிக்கு பதிலளித்தன என்பதை சுட்டிக்காட்டினார். ஒரு சோசலிச மற்றும் சர்வதேச வேலைத்திட்டத்தில் அணிதிரட்டப்பட்ட தொழிலாள வர்க்கத்தால் மட்டுமே இதைத் தடுக்க முடியும் என்று அவர் கூறினார்.

சோசலிச சமத்துவக் கட்சியின் அரசியல் குழு உறுப்பினர் பாணி விஜேசிறிவர்தன, ஜனவரி 3 அன்று கலைப் பீடத்தின் பீடாதிபதி மூலம் அரசியல் விஞ்ஞானத் துறைத் தலைவருக்கு அனுப்பிய கடிதத்தை மேற்கோள் காட்டி இரண்டாவது கேள்விக்கு பதிலளித்தார். 'கூட்டம் அரசாங்கக் கொள்கைகளை சவால் செய்வதாகத் தோன்றக்கூடாது, குறித்த கூட்டத்தின் தலைப்பைத் திருத்தி, அதன்படி விளம்பரப்படுத்த வேண்டும். இல்லையெனில் குறித்த கூட்டம் உடனடியாக இடைநிறுத்தப்பட்டதாகக் கருதப்படும்' என்றும் அது குறிப்பாக அறிவுறுத்தியது.

சமூக ஊடகங்களில் பகிரங்கமாகப் பரப்பப்பட்ட இந்தக் கடிதம், ஐ.வை.எஸ்.எஸ்.இ. கூட்டத்தின் தலைப்பு மாற்றப்படாவிட்டால் அது தடை செய்யப்படும் என்று தெளிவாகக் கூறுகிறது என விஜேசிறிவர்தன கூறினார். கூட்டம் ஜே.வி.பி./தே.ம.ச. அரசாங்கத்தின் கொள்கைகளை சவால் செய்வதால் தடை செய்யப்பட்டுள்ளது என்பது தெளிவான செய்தி என்று அவர் மேலும் கூறினார்.